ANTARA KASUSAH JEUNG KASENANG

ANTARA KASUSAH JEUNG KASENANG

Ulah ngarasula lamun pareng 

keur meunang kasusah 

eta teh kanyaah kaasihna nu 

maha asih 

maha nyaah 

supaya urang daek leah (leuwih leah) ngado’a menta ngan ukur ka nu salila ieu enya 

enya marengan ngauban 

bawa jeung mamawa maneh - 

sing kapanggih yen enya euweuh deui 

nu bisa jeung daek nulung iwal ti 

nu ngauban 

dumasar pamenta/ kahayang/ do’a sorangan, ngeunah geura geus kitu mah. 

Keur senang mah sok kapopohokeun 

hese husu sabab batur batur 

dulur dulur 

anyar pinanggih dikadunyaan 

nu pada deukeut 

pada hayang diaku 

bari geus umumna 

ari jalma mah sok 

katungkulkeun ku kasenang.

Dulur dulur 

batur batur nu deukeut 

sabab maneh senang moal datang 

lamun maneh keur susah. 

Kitu oge sabalikna 

engke manggihan 

nu jadi dulur jadi batur 

waktu maneh keur susah 

sok tara jadi terus deukeut 

lamun maneh geus senang 

da hirup mah papasangan 

owah owah ing SIR. 

Matak engke kudu bisa 

nyusah nyusah maneh 

bari senang kasebut basajan 

tara nyirikeun maneh senang teuing; 

kudu bisa nyenang nyenang maneh 

najan keur susah tong betus kaciri susah 

ucah aceh ka batur 

kasebut jelema sabar wekel 

kuat nahan nu karandapan 

ameh angger boga batur diduanana. 

Moal dipupuas ku nu deukeutna 

lamun urang senang 

moal dialah alah ku nu deukeutna 

lamun urang pareng susah.

Matak engkena 

mun bisa narimakeun diduanana 

bakal boga batur –

najan moal loba- 

nu sarua tara robah 

ku senang ku susah 

tah nu kitu nu engke bisa 

dijadikeun dulur 

pet ku hinis batur 

ka cai sok jaradi saleuwi 

kadarat jadi salebak 

sabobot sapihanean 

moal pisah sabab 

susah senang ukur jaradi 

jajantung diri.

Jadi meunang kasusah teh 

mun bisa narimakeunana 

syukuranana untung pisan 

bisa deukeut jeung nu maha asih 

nyaho (da memehna sabab kasusah 

terus diperedih can hasil mah) 

cara mentana 

najan teu kudu pok 

bari boga lawang tulung ti sasama na 

tara rubah rupana 

angger pasemona salah sahiji gambaran 

lir kasenang sawarga didunya.

Sabalikna kudu ati ati 

loba istigfar 

mun gancang gancang dibere senang 

hayang geura geura senang embung susah, 

sok jadi teuas hate 

teu daek leah ka gustina. 

Tungtungna ngaberung nafsu 

tunggul dilarud 

catang dirumpak 

kumaha maneh wae 

da karasana euweuh nu nulungan 

meunangkeun eta teh 

iwal ti nafsu manehna sorangan. 

Nu kieu teh sok digampangkeun 

dina hirup 

meunang kasenangan 

nu teu lila 

(dunya/pondok/sakeudeung).

Matak engkena, 

kusabab teu biasa sadrah tumarima 

ku susah sok gancang di kaiblisan 

nu hartina putus harepan 

(iblis/qublisa=putus asa) 

najan aya tuduh ti pangerana –

aya wae tuduhna 

najan kanu nolak gustina oge- 

tara daek sujud. 

Ari sujud teh ngamaha sucikeun 

bari muji syukur 

hartina nu kabeh katarima teh 

ukur tapak lampahna 

maha asih 

maha nyaah 

da datna sorangan mah 

euweuh upamana 

matak tara siga siga.