jatining kasampurnaan,

Gunung jiga anu ngariung, 

pasir jiga nu diukir, ngayuh semu ka nu wuyung, narik resmi nu prihatin, kagagas ku hawa alam, langit lenglang taya nu ngahalang-halang, 

sinar layung mani hibar, 

hurung ka unggal lulurung, malah hegar kana pikir, gumebyar lir sutra jingga, 

lir kaya direngga-rengga, ngahiliwir angin leutik, nebak kana kekembangan 

nu keur meujeuhna ceuyah beukah, 

munggah ngadalingding, siga katur ku panglipur, siga bakti panglelejar, 

mintonkeun wawangen alam, 

ciri wanci nu sajati, ciciren sifat nu tulen, pangaruh anu keur ngayuh , 

nyembah maunat mujijat, 

dina hiji lamping nu lempeng, 

di tutugan suku gunung Banjar Panemon, 

aya hiji bumi resi, aturan nu magelaran, 

jiga karang pangtapaan, panglungguhan anu husu, pangcalikan nu semedi, anteng sifat ka eling, nyusul panemu rahayu, ngudag babaran waluya, ngimeutan kasalametan, muji ka jatina diri, 

muja kanyataan rasa, 

nyifat tunggaling kawula 

jeung anu kagungan sifat, 

nyata ngudag tunggaling kawula Gusti, 

geus husu mareuman napsu, iklas nilar kawiwitan, teu ti belat ku duriat teu katarik ku nu luis, 

iklas sagala-galana, 

geus teu tolih kana sifat napsu dunya, 

wungkul tohid ka yang Sukma, 

ngaraoskeun gumelar dina "panalar" 

heunteu daya upaya. 

Saha nu kitu teh ?

Eh, geuning pangeusina bumi eta, 

nu di lamping suku gunung ,

jenengan alawi tea, 

nu harita nuju ngalantung dina lulurung, 

kairut ku waktu alus, kapelet ku poe hade, kabengbat ku paningal 

kana sugri kekembangan nu tumuwuh didinya, 

lir basa dipatamanan, pamipitan para ipri, pangulinan para dewa, 

ngabarak kembang ermawar pacampur 

jeung sumarsana, 

Alawi ngahuleng, 

kagagas ku kawaasan, 

ras ka diri nu keur nyungsi, 

ras ka badan nu keur ngudag 

jatining kasampurnaan, 

teu weleh maca Alhamdulilah 

muji ka Rohman-rohimna Pangeran.

Kaayaan kitu teu sabaraha lami, 

waktos anu ngajurung undur, 

burit nu ngajakan balik, 

geus meujeuhna wanci magrib, 

lajeng angkat ka tajug, di tengah empang ayana.

Henteu dinyanaan yen harita aya tamu, ti kota jenengan ^engkong, 

nya lajeng bae pada sembahyang di tajug. 

Sabada sembahyang lajeng lalinggih 

di tengah bumi paduduaan 

bari ngaleueut kopi na sunda akur. 

mudakarah ilmu, 

geusan bawaeun bekel nyungsi kasampurnaan.

ciri manusa anu sah kamanusaannana, 

kudu kersa ngamudakarahkeun pamendak, 

ari agama teh naon ? 

sareng mana  anu rada ewed, 

ceuk kaum ahrul sara: 

biasa bae nya-eta aturan-aturan 

anu dikudukeun ku kitab-kitab; 

demi ceuk ahrul Haq: 

eta mah lain agama tapi drigama, 

ari agama mah 

nya-eta elmu panyungsi diri 

pakeun jalan kasampurnaan.

pamendak ahrul Sara bener, 

pamendak ahrul Haq bener. 

Ngan ari pamendak alawi mah kieu : 

Agama teh asalna tina kecap Adin, 

hartina: "peraturan" 

tapi naha kong rek ngagugulung peraturan bae, atawa rek terus ngaturna, 

tah dina ngaturna mah, 

tegesna peraturan teh kudu dipigawe, 

ku aturan eta urang tangtu boga kapercayaan, tegesna tarekatna Agama = nya kapercayaan; sanggeus urang boga kapercayaan 

nya tangtu urang boga cecekelan atawa ageman, tah haqna agama teh ageman, 

kantun ngawujudkeun patekadan urang 

kalawan prak kana ngalakukeun kabeneran, 

tah dimana geus ngawujud eta ma'ripatna agama, tegesna geus Suci tea atawa geus Islam tea.

ari agama naon gunana ?

lahirna supaya dunya beres 

sarta batinna supaya manusa bisa sampurna mulih ka jati mulang ka asal 

nyumponan dalil : 

Inna lillahi wa inna illahi rojiun.

naha lahir tergantung ka batin ?

Duanana sami, 

ngan panuhun ulah tumaros 

urusan lahir heulaanan, 

enya urang teh aya dina lahir tea mah, 

mung engke deui eta mah.

naon ari lahir sareng naon ari batin ?

lahir 

sifat nu kasar nu katingal ku panon kapala, demi batin nya-eta 

sifat nu gaib; 

anu aya tapi euweuh; 

anu euweuh tapi aya; 

karasa sareng katingal 

ku awasna per elmuan.

Naha sanes ku panon Qolbi ?

Upami urang ningal barang Qodim 

tegesna gaib ku panon Qolbi, 

eta sanes anu saleresna, 

amung ku ciciptan bae, 

da panon Qolbi mah tergantung ka panon lahir, 

awasna qolbi nurutkeun awasna panon, 

geura mangga awasna qolbi  

ayeuna awaskeun ka Mekkah 

tangtos kana teu awasna 

da urang acan jarah ka ditu.

kantenan bae moal katingal mah 

da awas qolbi mah tegesna awasna qodim 

kapan paranti ningal nu qodim 

tegesna nu maha Suci, 

anu ceuk dalilna 

Ru'yatulahi ta'ala fie dunya biaenil qolbi.

urusan dalil ru'yat enya henteuna eta 

tergantung ka pamanggih pangarangna, 

ngan mangga akal pikiran  geura bukakeun 

sina hirup, ulah percaya kana pangreka jelema kapan ceuk tadi ulah taqlid, 

kudu karasa 

kudu kaharti, 

ru'yat qolbi salawasna 

tergantung ka pamanggih ru'yat panon, 

geura eta tingal nu gumebyar beureum, 

tangtos ru'yat qolbi 

guguru heula ka panon kapala, 

tegesna ari uninga yen beureum, 

meureun bae da geus terang rupa beureum, nyakitu deui anu koneng, bodas sareng hideung, 

geura mun  tacan uninga sifat di lahir, 

kapan ka barang nu diaku qodim 

moal tiasa ngareka rupana; 

mangga nyandak jalmi lolong, 

tapi ulah nu lolong anyar; 

kedah nu lolong ti barang gubrag ka dunya, 

cik pek mangga titah tajali atawa tarekat, 

naha qolbina tiasa awas sareng terang 

kana sifat-sifatna ?

urusan ru'yat qolbi 

mangke ditaroskeun deui 

kana kapentingan agama.

atuh ru'yatna perelmuan oge engke deui bae, 

da kedah berhubungan sareng ru'yat qolbi.

jalaran urusan ru'yat jadi seuhna perelmuan, engke urang pandeurikeun, 

ayeuna aya saur kieu :

"Maraneh kudu mikir kana dadamelan Allah, 

tapi ulah mikir kana Zat Allah, 

lantaran maneh moal bisa ngukur watesna", 

(duka bener, duka henteu, dalilna kieu : 

Tafakkaru fie chalqilahi wal tatafakaru fa inna kum lan taqdiru qadrahu).

ari dalil mah kudu kana kitab bae; 

surahna, sundana, malayuna, walandana, Inggrisna didinya aya kabeh.

peraturan teh kudu bisa jadi kapercayaan, lantaran kapercayaan anu berhubungan urusan 

ka Allah an aya 2 tingkat ceuk ahrul Sara : Tafakkaru fie chal qilahi 

wala tata fakaru fa inna kum lan takdiru qadrahu, 

tah dalil eta nu dikuatkeun, 

ari ku elmu Haq, dalil ieu nu dikuatkeun : 

Awalahu wajibin allal insanu ma'rifatulohitaala bistiqoni (awalu dini marifatulohi) 

eta mana anu leres ?

Sara leres, 

Haq leres.

eta dalil parantos kasaksi ku kitab-kitab.

upami ngabantun tina kitab, 

disaksian ku kitab, 

disahkeun ku kitab, 

meureun benerna ge bener kitab eta mah, 

mana ari bener keur urang, 

cing  atuh sing emut naha kitab 

nu neangan kasampurnaan teh? 

atawa urang ?

kantenan urang , 

ngan ngabantun jalan-jalanna tina kitab.

lupami  ngabantun tina kitab 

sareng nu dianggap sah tina kitab 

geus bae ulah sok nyarita jeung papada manusa, kitab bae ajak mudakarah, 

meureunan sagala aya, 

da mudakarah jeung manusa mah kudu terang elmuning manusa, 

eta kapan urang kapungkur geus jadi mu'alim, kapan lain mu'alim buaya ......... 

geuning ari pangakuan mah kapan 

jadi "mu'alim manusa" , 

tapi kakara jadi mu'alim kitab, 

da ku dumeh tacan terang elmuning manusa tea, tapi ayeuna mah sugan geugeuy.

nu dianggo saksi ku urang upami sanes tina 

hadis dalil atanapi kitab 

anu mana atuh ?

anu jadi saksi-saksi 

pikeun ngaenyakeun perelmuan oge ku tilu rupa : hiji akal 

dua pikiran 

tilu perasaan.

tah eta 2 urusan, 

nya-eta Sara jeung Haq pamanggih 

geusan nerangkeun kaayaan Allah, 

anu kasaksi ku saksi-saksi diri, 

.

jadi saksi rasa, akal jeung pikiran 

ayeuna rek milu nyaksian 

ka nu geus kasaksi 

ku saksi-saksi  tea ?

urusan dalil tafakkaru 

nu dikuatkeun ku ahli Sara, 

eta oge bener, 

margi ngabantun saksi kitab, 

nya kitu deui dalil Awalu wjibin, 

eta oge bener 

da kasaksi ku kanyataan pamanggih manehna, kalawan kasaksi ku imanna keur waktu tajali, 

ayeuna nerangkeun elmuning nu kapanggih 

sarta kasaksi ku kana dadamelannana 

ku percaya jeung ma'rifat oge kudu, 

tapi papada ma'rifat oge 

lain ngajinis kasaksi ku pancadria urang mah, ngan ma'rifat ka ayana Allah 

ku awasna elmu tea, 

"Saha-saha nu ditanya tina hal elmu 

tapi manehna teu nerangkeun, 

tangtu manehna dina poe Qiamat 

dikadalian ku kadali seuneu". 

(Man su ila an ilmin fa katamhu uljima yaumal qiyamatibi lijamin min-naar?)

tah geuning sanajan kitab oge sakitu nyarekna ulah sok nyumputkeun kanyaho, 

ngawitan nerangkeun dalil : 

Man arofa nafsahu faqod arofa robahu, 

sareng 

Man arofa robahu, faqod jahilan nafsahu. 

Sundana : 

saha-saha  nu nyaho ka dirina, 

tangtu nyaho ka Pangeranna, 

sareng Saha-saha nu geus nyaho ka Pangeranna tangtu dirina ngarasa bodo.

tah eta kang dalil pang pentingna 

anu matak urang kudu ma'rifat teh 

geura kanyahokeun jatining ingsun, 

tangtu engke ma'rifat ka Allah, 

sareng engke upami parantos marifat ka Allah, tangtos urang salamina ngaraos 

teu daya teu upaya usik malik 

anging ku pangawasa anjeuna 

anu ceuk dalilna deui : 

wahua ma akum aenama kuntum.

Saha-saha nu nyaho kana dirina, 

tangtu nyaho ka Pangeranna, 

tah eta bahasa Sunda 

nu eces nu nyata kalawan tetela, 

nerangkeun yen upami nyaho kana diri, 

tangtu nyaho ka Pangeran, 

ari diri teh 

lain urangna, 

lain Ingsunna, 

diri mah jirim jeung jisim, 

ceuk bahasa Walanda mah : 

stoffelijke lichaam en astraal lichaam, 

jadi tegesna yen "urangna" 

disifatan ku jirim sareng jisim (rohman-rohim) tangtu terang ka nu kagungan eta persifatan, nyatana nya Maha Suci tea.

Sanggeusna urang terang ka nu nyifat ka urang, kakara urang sing rumasa 

Lahaula tea, 

tah nu Lahaula mah jatining ingsun tea.

dina kitab ditulis, yen Kj Nabi Muhammad 

teu pupus, sabab lamun anjeunna pupus 

alam dunya oge moal aya, 

pupus soteh majajina nu Sumare di Madinah 

tapi Hakekina mah aya di urang, 

nu matak wajib dikanyahokeun.

Jadi tegesna maksud eta kitab 

majajina aya di Mekkah, 

hakekina aya di urang ?

ari akrobna Majaji jeung Hakekina 

dina naon ?

Dina Wujud !

ari majaji akrobna sareng hakeki dimana ?

dina wujud 

lajeng diasmaan 

Tah geuning piraku bisa jadi, 

majaji aya di tanah Mekkah, 

ari hakekina di Pulo Jawa, 

kapan majaji tara jauh ti hakekina, 

majaji tunggal jeung hakeki, piraku pipisahan, komo ieu nu lain-lainna deui, 

beda bangsa beda martabat, 

ceuk cohagna mah pamohalan 

aya majaji onta hakekina kuda, 

jeung deui 

ari elmu di urang enya oge 

make ngaran Muhammad majaji, 

Muhammad hakeki, 

enya make ngaran Muhammad tea mah, 

tapi ulah nyabit-nyabit ka Muhammad Kj. Nabi, 

ieu mah Muhammad lalandihan tukang elmu bae, tegesna teu patali jeung itu.

sifat anu 20 -- l

dipecahan 4 bae. 

Nafsiah, 

Salbiah, 

Ma'ani, 

Ma'nawiah.

nafsiah nyatana napas

salbiah nyatana panon (heherangna)

ma'ani nyatana lelegok ceuli

ma'nawiah nyatana sungut,

Ari pecahan 4 dina sifat 20 teh 

ngawincik sifatna Allah ? 

Atawa ngawincik pancadria ?

Ari sifatna mah sifat Allah, 

mung bae kapan lamun milari Pangeran kaluar tina diri tangtos kasasar.

Naha lamun parantos terang kana 

napas, panon, ceuli, sungut, 

naha parantos ngaraos panggih sareng Allah ?

Kapan didinya ayana tarekat jati, 

saparantos terang sifat nu 4.

teu naroskeun gumulungna sifat nu 4 

dina keur waktu tarekat, 

naros soteh sifat-sifatna, 

piraku aya sifat Allah 

dina ceuli, dina sungut, 

kapan sifat 20 mah kaayaan Allah 20 sifat, 

kapan ceuk tadi oge sifat 20 mah katerangan, tegesna katerangan geusan neangan Allah 

kudu make sifat 20, 

jeung deui lamun ngawincik sifat nu 20 

dina ceuli, mana atuh langgengna ?

Dina Qodimna.

Naon Qodimna teh ?

             Qodim napas angseu

             Qodim ceuli denge

             Qodim panon awas

             Qodim sungut ucap,

anu matak didinya aya puji Qodim alal Qodim, hartina : 

Sumembah ka sifat Qodim mah 

kudu ku Qodim deui.

Sumuhun nu langgeng mah sifat "Qodim".

Kamal : Kang ulah lepat faham pang nyebatkeun aya Allah di badan, tegesna Allah angliputi urang kalawan Kudrat, Iradat, Ilmuna, jadi sategesna mah aya sifat hirup di urang.

Naha henteu 20 hannana ngaliputan salira bet Qudrat, Iradat Ilmu wungkul ?

Sadayana oge ngaliputan.

Ari Kiamuhuta'alabinafsihina, 

saha nu ngadeg ku anjeun ?

Allah !

Ari urang ngadeg ku anjeun ?

Kantenan ti sabarang emut oge  geus kieu 

da buktina teu inget ka alam asal.

Har, kumaha 

ari ngangken geus marifat ka Allah, 

tapi luak leok ka alam teu inget, 

ana kitu engke ngangken ka Allah ka kaula-Na.

Sumuhun raos kalawan katerangan tina sifat 20 kaulana tea nu dianggap Pangeran, jalaran kapan dina seuhna perelmuan geusan nyungsi jatining rasa, sedeng kapan ceuk dalil oge, rasa isun ya rasa gusti (al insanu siri waana siruhu).

Sing inget 

kapan parantos seseepan dina buku taudz nerangkeun yen sakadang isun mah sagirna 

tina idajil, 

sareng deui mungguh  kaayaan isun sareng kaula tea teu kinten bentenna, 

ari isun mah nya nu parantos diterangkeun tea, 

ari kaula mah hiji titel (asmana) si ingsun 

anu geus kumawula, 

tapi kade dina enggon-enggoning kumawula 

sing emut, sanes kumawula ka dunya, 

atuh eta mah kaulaning dunya, 

tapi kedah kumawula ka gusti 

kakara jadi kaulaning Gusti, 

sareng deui ari pecahan sipat 20 mah bagian Nfsiah, Salbiah, Maani, sareng Manawiah 

teu kenging disalang surupkeun 

kana napas, ceuli, sareng sungut, 

da eta mah wincikan Jasmani, 

da sifat Pangeran mah sifat Goib, 

jadi nu diwincik teh kedah goibna bae, 

kitu oge upami parantos af'al kana kaayaan goibna diri ulah ari diaku sifatna Pangeran mah, kudu ngaku soteh af'al kana sifat Pangeran 

anu nyifat di urang, 

geura urang terangkeun saeutik tina bagian pecahan nu 4 sareng nu 2 Tina Nafsiah, 

tegesna Wujud nu Maha Suci teh tetela ayana, 

eta Datna; tina Salbiah nya saksina nu Maha Suci, teu kenging ditandingkeun sarta di cita-cita kalawan diadegkeun ku urang, tah eta sifatna.

Demi af'alna, lantaran nu Maha Suci murahna 

ka kaayaan dunya miwah nu ngeusiannana 

ku Rohman Rohim Pangeran, 

nyakitu deui tumibana ka urang 

eta Rohman Rohim, ngajadikeun af'alna 

ku gelarna sifat Ma'ani.

tina rohman Kudrat jadi Anggahota

tina rohim    Kudrat jadi Pangawasana

tina rohman Iradat   jadi Jajantung

tina rohim    Iradat   jadi Kadaekna

tina rohman Elmu     jadi Uteuk

tina rohim    Elmu     jadi Elingannana

tina rohman Hayat    jadi Napas

tina rohim    Hayat    jadi Hurip

ku katerangan di luhur 

urang tetela pangakuan kana ayana Pageran teh da sidik sifat rohman rohimna 

geus nyifat sifat Ma'ani ka urang, 

ari dina pecahan 2 tea 

nyaeta istiqor sareng istigna, 

geuning ari keur waktu tarekat 

bakal ningali cahaya lir kaya sumorotna 

panon poe ti pukul 9 dugi ka 11, 

kapan sidik siloka anu maksudna 

urang kudu terang yen anu bisa tunggal 

jeung wujud (11) nu Maha Suci 

anging nu geus bisa nunggalkeun (Wahdaniat) atawa 9 tea, 

jadi seuhna.

9 -- Wahdaniat = tunggal

seuhna 11-- Wujud = aya

tapi awas nu tunggal jeung nu Maha Suci teh kudu sifat nu Suci, 

lain Wahdaniat wadahna niat, 

ngan niat jeung niat bae, 

ari ngawujudkeun Suci mah tacan keneh, 

nggeus bae angkeuhan ngaku sajero tarekat nuggalkeun (akrob) jeung sagara ning Suci, 

puguh si isun, 

mun boro-boro sasifat kapan kumawula oge 

can bisaeun, 

dibawa solat oge sok ngatrok bae, 

cing mangga lenyepan, 

enya aya puji "Qodim Alal Qodim" tea mah, 

da gaib si isun mah sanes gaib Pangeran 

kapan gaib billa haefin tea, 

nu sok nyuwungkeun sifat nu aya, 

nya terus Asmauli Jinsi, 

ngajiniskeun Allah dunya tea, alias ........ 

Nur Cahaya.

Sareng deui keur waktos 

ngagulungkeun sifat nu 4, 

ulah rumaos nyumponan dalil: 

Al Insanu Siri, 

enya lali ka diri hilap ka badan tea mah,

atuh da eta mah pagawean si isun 

ana fana osok kitu sareng 

sanes antal maotu deuih, 

geura si isun ana boga kahayang sok tauhid, upamana nu bahari kaharti ku akal bae, 

lalakon Mi'radna si isun, 

upamana pareng urang jalan jalan di jalan gede, lar nu tumpak motor, leng bae si isun ka bengbat, terus mi'rad, 

ngimpi sajeroning rasa ngabogaan ata motor anclong-anclongan ka Pasar Baru sagala, 

kapan eta geus lali ka diri tega ka badan, 

kapan suku mah terus leumpang 

tapi si isunna keur tumpak motor 

panggih jeung nu wawuh oge tara patanya, 

mun teu di gebah, tah kitu kaayaan miradna 

si isun, 

tapi maaf lain nuduh 

mirad sajero tarekat 

osok kitu, 

ngan ieu mah tadi ge ibarat.

 naha  unggal nerangkeun pamendak wungkul 

nu kahartos ku akal bae, sedeng dalil-dalil 

nu tina kitab mah sok di ludat-ledot, 

kapan nu bener mah anging kitab ?

Bener kitu Sumuhun.

Pamendak mah sanes kitab 

ngan saukur bebeneran.

Sumuhun, geura mangga candak kitab, 

naha nu baris maca teh urang, 

atanapi kitab nu maca urang?

Kieu geura,

ieu urang ngabantun cau, 

meureun nu di arah teh rasana.

Tah lepat eta teh, 

kapan rasa mah parantos aya dina raos urang, ngan amisna dina cau tegesna rasa amisna cau, 

nya kitu deui kana kitab, 

benerna aya di urang, 

bebeneran aya dina kitab.

Tah leres upami hayang bener 

kedah ngabantun bebeneran.

Teu kedah, 

da bener mah teu tergantung ka bebeneran, 

sing emut, bener mah sanes bebeneran, 

lumpat mah sanes lulumpatan.

ari alawi percaya henteu kana kitab ?

eta bae, ari salira alawi teh ahli elmu, 

sedeng rupina ngalainkeun ka kitab, 

kapan nu matak ngelmu teh 

ngaku Islam panginten.

Ari ngaku Islam mah henteu, 

da diajar keneh, 

mun ngaku keur nyungsi alawi rumasa.

Sumuhun sawios keur nyungsi oge 

ngan eta percanten kana kitab teh 

atanapi henteu ?

Samemeh nerangkeun percanten henteuna 

alawi tumaros heula 

naon henteunna percanten, 

sareng kapercantenan ?

Kapercantenan mah padamelan, 

dupi percanten mah parantos didamel.

Tah nuhun upami  ngartos mah, 

upami alawi digawe teh 

naon tah nu dipigawe teh?

nya pagawean ?

upami percaya ?

nya kapercayaan !

kapercayaan saha ?

nu tangtos 

kapercayaan jalmina anu percaya.

tah geuning ngartos 

kapan percaya teh kana kapercayaan pribadina, sanes kanu sanes, 

atuh ulah tumaros,

percanten henteuna kana kitab, 

kapan kapercantenan teh sanes keur batur, 

da persoon teh sanes persoon , 

Lieur kang, pan urang teh palay sampurna, 

na naon atuh ari sampurna teh ?

jalaran alawi teu acan sampurna, 

jadi upami engkong hayang terang sampurna taroskeun bae ka nu sampurna.

teu terang saha nu parantos sampurna.

eta alawi uninga basa sampurna timana ?

mun kenging tina buku-buku.

tah atuh taroskeun bae kana buku.

cing atuh lain sing leres bae ngawaleran teh, kapan saur na keneh 

pang ngelmu teh 

pigeusaneun nyungsi kasampurnaan.

sumuhun da kasampurnaan mah 

sanes sampurna.

naon atuh ?

Geus diterangkeun pang ngelmu teh 

pigeusaneun nyungsi kasampurnaan, 

samangsa-mangsa geus uninga kasampurnaan tah kakara nembe sampurna. 

Kapan ayeuna mah boro-boro sampurna 

kapan kasampurnaan oge nembe dipilari.

kapan aya deui basa Insan Kamil Mukamil, 

hartina sampurnaning sampurna, 

bakal beak rasana jasmanina, 

jadi dat laesa kamislihi, 

naon ari eta teh ?

eta mah sampurna beak  

ari pamendak alawi mah 

kecap sampurna teh Compleet; 

kieu geura:

keur jaman orok urang teh eling, 

ayeuna geus akir baleg urang ngarasa eling, 

tah dina eling na ulah hayang teu eling deui, 

tapi kedah gaduh tekad nyungsi sagaraning eling, kapan seueur paguron anu nekadkeun 

hayang teu eling deui , 

eta teh sampurna cenah, 

jadi Qamislihi deui; 

benerna mah nyungsi sagarana, 

tah sagarana nu pantes disebut sampurna mah, tapi lain eling wungkul, 

da tadi ge diterangkeun 

yen sampurna teh compleet, 

tegesna ari nu kagungan sifat sampurna mah anging Pangeran, 

ari eta Insan Kamil Mukamil 

bakal manjing kana Dat laesa qamislihi deui, 

eta oge leres teu aya lepatna, 

namung saha tea ? 

Si isun atanapi jirim jisim ?

Jirim, jisim mah 

pantes manjing kana Dat laesa deui oge, 

da sifatna itu, 

tapi urang nu kajadiannana tina sifat itu.  

Naha geus jadi insan ? 

kapan ngigelkeun kamanusaan 

maka lagu Islam teh sakieu hesena, 

sok saliwang bae, 

boro-boro nincak laguna, 

nincak kecrekna oge salah bae,

Komo, Kamil,

Komo deui mukamil

wah anggur ge jeung lalamunan 

jadi insan kamil mukamil mah 

mending diajar semedi, 

supaya ulah kabengbat ku pangreka 

paguron palsu, 

tapi semedi ge awas lain semedi 

ngeningkeun cipta, ngagedekeun cita-cita, 

atuh lapur deui 

eta mah kaasup kana elmu 

"Meditatie en Gedachten Concentratie" , 

gawena ngagulungkeun tekad, 

ari tekad-tekad si isun komo kitu digulungkeun, sasat lamun kuda teah mah dilepaskeun, 

nya terus nyebrut ka dunya deui bae, 

hayang mulya, 

hayang pinter, 

hayang maju, 

malah mun lugay ti Jasmani tea mah 

hayang nitis kanu leuwih senang ti batan ayeuna, 

ari ngaku elmu Allah, 

tapi gawena cedihan, 

embung mingpin anu miskin, 

embung nungtun nu dusun, 

tapi oborna mah Liefde (welas asih ka sasama) ngan sasamana 

lain sasama gumelar, 

tapi sasama saharkat, 

sasama samartabat, 

da ari kanu hina mah teu daek ngaku sasama, 

tara nulung kanu butuh nalang ka nu susah, 

ari manggih nu prihatin teh teu milu sedih 

anggur nyered ka papasten, 

kieu takdir kitu takdir, 

nuding kana pambalesan, 

welas asihna teh ngan saukur nyebut paingan: 

"De oorzak en 't gevolgd" 

tuluy semedi pagede-gede ciptaan, 

nlik takdir nyawang kadar, 

mugi-mugi ulah pinanggih prihatin , 

nyorang sagaraning lara, 

anggur hayang wuwuh-wuwuh dilahir 

ginanjar rahmat 

tah nu kitu kaliru keneh, 

benerna nyifat pasifatan Allah mah 

enggon-enggoning miwelas miasih teh, 

teu pandang bulu teu pandang rupa, 

teu pandang kaya teu pandang miskin, 

teu pandang bangsa teu pandang agama, 

kasifat nu papada Gumelar mah welas asih bae, jeung teu pandang pamuji, teu pandang pamojok, estu iklas kumawulana ka anu dikawulaannana, geus iklas kana nafsu dunya, 

wungkul tauhid ka Yang Suksma, 

ulah cara ieu pangakuan mah 

teu takluk kana kahayangna nafsu (begeerteloos) tapi si isun anu kabur, 

diangon di tegal angkeuhan 

dirungruman kamulyaan alam dunya.

Tah kumargi eta, 

ku pangrasa alawi mah, 

tinimbang urang seueur miceun waktu 

anu percumah, 

anggur eta waktu teh geura anggo keur ta'udz (salindungan kahadean, anggangan kagorengan), 

da sanaos urang 

seueur elmu, 

seueur aosan, 

seueur jampe sareng kitab-kitab oge, 

upami urang teu kersa Ta'udz mah 

tetep Batal-na, 

hartosna moal soheh (sah) 

pangajina teh, 

sareng sabalikna sanaos urang 

teu tiasa maca, 

teu tiasa ngobrol oge, 

tapi ana kersa Ta'udz mah 

eta mah sami bae urang teh 

geus bisa nyumponan kana ngaraning manusa 

nu katetepan ku kamanusaannana 

sareng moal keuna ku batal jeung haram 

sanaos aya di tempat mana oge; 

sakitu bae heulaanan , 

etang-etang bantuneun ka diri 

oleh-oleh ti alawi.