kahusuan agama .Naha husu kumaha.

katerangan sareng saksi kitab ?

Lamun hayang katerangan sareng saksi kitab, atuh taroskeun bae kana kitab, 

ieu teh urusan agama, 

sedeng jaman ayeuna mah kedah tiasa milih 

nu sah.

Hal urusan sah henteuna eta urusan kitab, 

ngan sing emut bae, naha saha 

nu nge-sahkeun kitab ? 

atawa kitab nu ngesahkeun na ?

 

kahusuan agama .

Naha husu kumaha.

Hayang husus kana solat, 

supaya entong sok utrak-atrok.

hayang bisa  babarengan 

sareng jirim sareng jisim ?

Ari maksud  nu disebut solat teh naon ?

Sumembah ka Maha Suci.

Geus bisa can sumembahna ?

Nya-eta kapan  disebatkeun utrak-atrok, 

sulaya tina adegan sembah, 

cindekna teu acan tiasa, 

tah ku margi teu acan tiasa, 

ayeuna kedah kumaha supados tiasa tauhid.

Samemeh  nerangkeun patauhidan solat,  

kedah ngartos heula, kana wincikannana, 

naon nu matak urang sok ngalakonan waktu, sembahyang di saban-saban mangsana.

Ari emutan  mah kalawan gelarna agama 

disebat pagawean.

Tah yaktos pisan  disebatna pagawean, 

tah urang teh rek ngagugulung pagawean 

atawa arek digawe.

Kapan eta oge digawe ku kalimahna 

kalawan prak nangtung, lungguh, ruku, sujud, jeung paneda anu nyumponan cara-carana.

Ngaugkeun digawe, 

cing kumaha   wincikan na   

Mimiti nu diaos naon ?

Adan, 

Muji ka Allah nu sifat Akbar.

Naon  hartina Akbar ?

Agung, 

jadi teu aya deui nu agung 

salian ti Maha Suci.

Naha parantos terang kalawan percayana 

yen Allah teh Agung ?

Kantenan terang kalawan percanten 100 % 

yen Maha Suci teh kalintang agungna.

Tah ning  parantos terang kalawan percaya mah parantos bae tong di omomg-omong keun diapalkeun unggal solat, 

da puguh Maha Suci mah geus tetela 

agungna, 

jembarna, 

kawasana, geus teu kedah deui di puja-puji 

da sadaya puji oge kagungannana, 

urang oge kapan usik malik pupujian oge 

ku pangawasa Anjeunna keneh, 

tah parantos kitu ngaos naon, 

tapi ulah salah paham, 

lain nyarek make kalimah eta, 

ngan gera prak kalimah anu diucapkeun teh 

geura lampahkeun !

Parantos kitu urang ngaos 

yen teu aya deui anu disembah anging Allah . . . . . . . . .

Parantos terang ayeuna mah 

yen nu wajib disembah anging Allah, 

atuh geura prak, sagala ulah tuturut munding, 

ari prak mah teu acan keneh, 

ceuk tadi taya deui nu wajib disembah 

anging Allah, 

kumaha eta  parantos nyembah ka Allah ?

Numawi  kacida lieurna 

sugan teh sumembah ka Allah teh 

biasa bae ku omongan jeung pupujian.

Enya  kapan eta mah ngan ngabejaan, 

tegesna nitah soteh kana prakna 

lain nitah ngalelewe, 

eta pang pentingna (voornaamste) 

kalimahna naon ?

Alfatihah, 

sabab teu aya deui kalimah anu pang pentingna lian ti fatihah.

Naon Sundana ? 

Atawa surahna ?

Ari maksudna mah 

urang teh nyuhunkeun kanu Maha Suci, 

supados ditungtun kana jalan nu lempeng 

sarta suci, 

ulah ka jalan nu sasar sarta masiat.

Jadi urang teh nyuhunkeun ditungtun 

kana jalan lempeng 

ulah nu sasar ?

Sumuhun.

Nahs geus terang jalan-jalanna 

ka sifat nu lempeng 

jeung nu sasar ?

Pamendak abdi mah, 

jalan nu lempeng tangtos ka sifat kabeneran atawa kahadean, 

nu sasar tangtu kana kagorengan.

Tah geuning  geus ngartos, 

anu sasar anu lempeng, 

tegesna sasar lempeng geus aya di urang 

ngan kantun urang nu milihna 

tegesna nya ngalakukeun, 

naha atuh , unggal waktos menta ditungtun, kapan hade goreng geus aya di urang.

Eta bae supados tiasa ngambah jalan 

anu lempeng tea, 

numawi mindeng nyuhunkeun oge.

Naha kira-kira lamun  hantem nyuhunkeun ditungtun kana jalan nu lempeng, 

tapi kalakuan ngadatkeun kalakuan goreng 

naha tiasa dijabah ?

Nu tangtos moal.

sing  kahartos, 

kiyeu kapan Allah mah geus kun pa yakun, 

hade goreng geus aya di urang 

ngan urang nu kudu boga kanyaho (Elmu) 

anu matak kudu bisa ngelmu oge, 

nya-eta pigeusanneun milih-milihna, 

elmu nu dipake tahapan pakeun 

nincak jalan hade, 

kalawan prak nunda gorengna.

nu gorengna urang tobatan.

Tobat ka saha rayi ?

Nya kanu Maha Suci.

Naha da Allah 

mah moal ngaganjar moal deuk nyiksa, 

ari tobat mah eta kudu ka diri sorangan , 

tegesna kudu eureunan kalakuan 

anu karasa goreng, 

sabab anu ngaganjar jeung nyiksa mah 

buah-buahna kalakuan urang keneh bae.

ari sumembah ka nu Maha Suci kumaha ?

Kieu geura, 

ari sumembah ka Maha Suci mah 

teu kenging ku lisan bae, tapi kedah prak, kalakuan urang wujudkeun nu sifat suci, 

tobatna nunda kalakuan nu goreng 

anu geus kasorang ulah deui-deui dipilampah, malah geuning talari sepuh-sepuh mah 

kudu korban meuncit sipat bangsa hewan 

sarta urang teu meunang ngakan deui dagingna , eta hartosna sifat-sifat ka hewanan 

nu aya dina kalakuan urang kudu di peuncit, tegesna sina paeh atawa leungit, 

sarta urang ulah ngakan deui dagingna, 

hartosna ulah ngicip-ngicip deui, 

sarta ceunah ceuk kasauran mah 

unggal Mulud kudu indit neukteuk buntut 

ka Cirebon 

hartina sing inget urang ngarereb di dunya 

keuna basa owah gingsir, 

bisi poho sang hewan buntutan deui 

tegesna ulah nyorang deui, kalakuan anu goreng geura teukteuk, 

mukedaskeun dina wedal Kanjeng Nabi, 

tegesna kalawan Rasa Sejati, 

nu aya dina balumbang timurna Rasa Caang 

sing cara somorot bulan tanggal 12 Mulud, 

tah kakara solat eta mah sumembah kalawan husu, Iman, Tauhidna, Marifatna kalawan Islamna, gumulung ngajadi hiji, 

nyungsi bibit kasucian, 

ngudag arah ka Allahan, 

moal keuna ku hama haram jeung batal 

da eling salamina.

Jadi teges ari ngaran-ngaraning sumembah mah kudu kalawan prakna 

tegesna kalakuan ?

Enya pan, 

mun jelema keur resep di sifat goreng , 

sarta sabalikna mun keur milampah kahadean, hartina keur sumembah kana wujud Suci. 

Tapi lebah dieu  kade kaliru ku kasareatan, 

loba jalma nu ibadahna getol, 

tapi kalakuannana sulaya tina sembahna 

tegesna tekad ucap lampahna paaing-aingan, jajauheun kana bener nu kitu jalma kafiran, 

tapi tetep ari martabatna mah kolom kasasar, kasasar oge lain kasasar karampa, 

tapi sasar teu boga ageman 

ceuk basa arab mah ba'id.

Tapi kumaha urang dina cara-cara umum, 

kapan dina lumbrahna 

pada kaula mah ibadah teh 

loba nu ngan semet lisan.

Naha urang tergantung ka lumbrah, 

eta urang boga rumasa 

tekad sumembah ka Maha Suci, 

lain tergantung kana persoonlijk ?

Ari patekadan mah tergantung ka persoonlijk ngan eta bae kumaha keur lumbrah ?

Naha urang milu ambil pusing 

ka lumbrah nu salah, 

nu sarare keneh teges tacan hudang 

ka bagian ka Allahan , 

tapi urang sorangan geus beunta, 

teges geus awas ka nu di maksud, 

naha  rek sare deui bae ? 

atawa terus berjalan.

Eta bae panginten 

ari teu nyumponan kasare'atan mah, 

jadi omong pada kaula.

ari jadi omong mah tangtu, 

da kaayaan nu kitu pagaweanana manusa, 

goreng ku gorengna, hade ku hadena teu weleh jadi tutur catur, buah carita, goreng dipojok 

hade dipojok, 

mana palebah dinya kuatkeun Iman urang, 

sing bisa tirakat ngetan, 

lain ngetan ngakan ketan, atuh eta mah 

matak mejen, 

tapi siloka ngetan hartina sing kuat 

ku kapanas hate, 

tapi umum oge ari beunang mah 

geura tungtun bae, pecak-pecak elmu urang 

geura tembongkeun ibarat konci, pecak asupkeun, tapi lamun sakira sereg mah entong dipaksa , temahna matak rujad duduluran, 

sing emut ka saurna Dewa Brahma 

ka Sidarta Kapilawastu nyebutkeun 

kana tujuan Buda Sidarta, 

yen lamun kabeh manusa cara manehna, 

tangtu alam dunya moal rame, 

sarta kumaha jawab Sidarta ? 

Kuring teu rek ngomean nu embung, 

tapi arek soteh ngomean nu daek 

kalawan anu geus hirup akal pikirannana 

katut perasaannana.

saha ari Guru mursid, nu aya di badan urang.

Ari nuduhkeun mah teu bisa, 

da sa-enyana oge susah, 

ka ngaranan boga Guru mah 

kudu geus bisa guguru.

Kiyeu geura, 

ari sa-enyana guru mursid mah 

taya lian anging sifatna Allah, 

sabab ngan sifatna Allah anu bisa akrob 

jeung Allah jeung Rasullulan teges 

bisa lumebet lahirna ka Baetullah, 

batinna Baetal ma'mur.

Sifat nu mana tea ?

Nya-eta 

Kudrat, Iradat, 

Ilmu, Hayat, 

Sama, Basar, 

Kalam 

atawa Sara jeung Rasa, 

atawa Rahman jeung Rahim, 

atawa Jirim jeung Jisim, 

jadi kanyataannana mah nya ieu, 

Muhammad Majaji jeung Muhammad Hakeki. Lahirna urang diajar ku majaji 

kalawan pangawasa Pangeran, 

urang jadi loba kanyaho, guna pangartina; 

batinna diajar ku hakeki 

kalawan Kudrat, Iradat Pangeran, 

urang jadi boga perasaan 

guna kaluhuran budi.

ibarat jeung isarah supados  jelas ngartina.

Kiyeu , 

hiji ewe salaki, 

upama ngumbara ka negri Walanda, 

diditu cunduk ka waktu ninggang ka mangsa 

eta jelema teh boga anak, anakna geus tangtu adat tabeat kalawan basana 

nu ilahar dipake didinya, 

malah kadaharannana oge tangtu kadaharan 

nu aya didinya, 

tah ku rarasaan eta budak mah 

manehna teh bibit urang Walanda, 

kabetahan karasa taya wates wangena. 

Tapi sanggeusna akir baleg 

sarta geus boga kanyaho, 

manehna kakara ngarti yen manehna teh 

asal urang tanah Jawa, 

ngajuru salebet ngumbara ayeuna eta budak 

salin perasaan, keukeuh cumantel hayang bisa mulih ka Jati mulang ka Asal 

tegesna hayang bisa balik ka nu diibaratkeun tanah Jawa tea.

Tah ku margi eta, 

ku ka mistian mah anu baris ditanya 

ku eta budak teh, teu aya deui 

anging Indung Bapana, 

da ngan eta nu wajib dicukcrukna , 

ngan eta nu jadi Guru Mursidna, 

urang ge nya kitu geura kanyahokeun bae "Rohmani Rohim" da eta nu asal tina Datna Gusti. 

Ngan ayeuna etang-etang panutup carita , 

gampil kapayun urang teraskeun deui . . . . . . . . . .

Ibarat cai, 

ku kaayaan geus jadi (es), 

upama disidikeun es teh bet cai wungkul, 

kitu deui badan urang, 

upama di sidik-sidik mah  

Jas-mani teh Rohmanian, Roh-himna 

berguna keur ngarasakeunnana . . . . .

Atuh ayeuna mah ibarat keur jadi es, 

ulah resep dibungkus ku tai raga ajian bae, 

jeung ulah ngahayoh neangan raga-jieun bae 

bisi urangna 

(es teh caina ngahiji jeung RAGA-JIEUN). 

Hartina mah 

sukma teh ulah akrob jeung raga-jieun (stoffen), tapi samistina upami  

palay ngahiji sareng Allah 

nyalindung bae atuh ti ayeuna keneh 

kana wujud anu sarae, 

moal salah deui lugayna jasmani teh ROHMANIROHIM  (sifat nu nyipatan) ka urang bakal kana Dat-na deui . . . . . 

Es nyalindung ka cai, leungit es jadi deui cai . . . . TA'UDZ atuh, anu tangtu bakal aya 

di-nu di-salindungan . . . . . .