IBADAH JEUNG PAMUSRIKAN, DIMANA LEBAH LEBAHNA ?

[17/9 16:23] aji rasha: 

1.IBADAH JEUNG PAMUSRIKAN, 

DIMANA LEBAH LEBAHNA ? 

1. IBADAH

Ibadah hartina : 

" ngabdi tumut turut bakti tug tutuhu 

ka nu mahasuci 

Allah swt 

lain ka salian ti eta."

Tangtu geus pada dikanyahokeun, 

sakabeh ajaran ti para ‘ambiya’ 

(jalmi jalmi nu ngadugikeun beja/ajaran 

ti pangeran, 

lain ti hawa nafsuna) 

dimana wae ayana 

naon wae sesebutana, 

kacatet dina Mushaff Utsmani, 

ngabogaan cecekelan 

yen ayana/diciptakeuna jelema 

jeung sakabeh mahluk teh pakeun/euweuh deui salian ti ibadah, 

nyatana ngabdi bakti tug tutuhu tumut turut 

ka nu maha suci 

Pangeran nu ngamurbeng 

(Allah/Hyang/God 

kumaha wae nyebutna 

asal alus –asma al husna) 

‘wa maa khalaqtul jinna 

wal insa illa liya’buduuni’ 

(Angin puyuh (51):56).

Jeung nya ibadah 

ka Hyang Maha Agung iyeu 

(lain ka salian ti eta) 

nu disebut shiratal mustaqim - 

jalan hirup nu lempeng bener menceger 

tur meunang ni’mat 

‘wa ani buduunii haada shiraatum-mustaqiim’ (yaasiin (36): 61) 

najan beda beda 

teu kudu sarua sareatna/jalana/metodana.

Kusabab usik malik hirup 

jeung sakabehna keur ibadah ka Maha Suci, 

nya atuh tara/teu meunang sekuler, 

misah misah, atawa beda beda: 

Ulah ari shalat (ngado’a) karana Allah, 

puasa (ngeureunan/nahan nafsu kajelemaan) karana Allah 

sedengkeun ari kawin karana bogoh, 

dudunya sabab butuh keur hirup, 

dahar karana beuki jeung lapar, 

kiih ngising sabab kabelet 

hayang kahampangan kabeuratan, 

dibaju sabab tiris sabab resep, 

nulis nyarita saukur hayang. 

Ulah susundaan 

hakekatna sabab karana luluhur 

atawa pedah jadi urang sunda; 

iislaman sabab dititah ku indung bapa 

atawa ku ustad/kiai 

tapi kudu kabehanana 

sabab jeung keur ibadah tug tutuhu 

ka nu maha suci.

Nepikeun ka, ngerejet mireungeuh tur ambekan kaluar ka jero, malah ketugna jajantung tur usik malikna hate mantengna angen angen mikir jeung ngucap ngadenge kudu mangrupa ibadah ka nu maha suci teu meunang henteu jeung teu meunang ka salian ti eta.

Eta kabeh, teu meunang misah misah teu meunang beda beda sab kitu kuduna matak diciptakeun diayakeuna mahluk jeung sakabeh usik malikna teh. Nya kusabab hirup jeung usik malikna malah paehna keur tutuhu ka maha suci, boh di arab boh di sunda nu lampahna aslamtu sumerah ka gustina mah, sagala lampah teh kudu wae aya do’a/rajahna nu nyambungkeun jeung nu ngamurbengna 

–dina hadis kasebut yen do’a uteukna ibadah

- Copelna make bismillah atawa saeutikna sanduk sanduk heula ka Maha suci.

CECEKELAN DINA IBADAH

Pakeun cecekelan 

atawa kaperluan ngaturna 

anu leuwih jentre 

dina prak prakan kahirupan sapopoe, 

aya patokan dina ushl fiqh:

Al-ashl fi al-ibādah al tahrim, 

illā mā dalla al dalil alā khilafihī; 

Al ashl fi al-asy’yā (ghair al ibādah) 

al ibahah illā idzā mā dalla al-dalil alā khilafihī.

Sundana: 

Sagala hal ulah dilakukeun 

iwal ti aya titahna/tuduhna; 

Sagala hal meunang dilakukeun 

iwal ti nu diulahkeun 

atawa nu dicaram/dihulag.

Kaidah kahiji nu dicutat diluhur, 

Al-ashl fi al-ibādah al tahrim, 

illā mā dalla al dalil alā khilafihī,

loba kapanggih contona 

dina ibadah ritual formal: 

Ulah sahadat rasul 

‘Ashadu anna Muhammad Rasulullah’ 

ditambahan nyaksi 

ceuk cenah/

ceuk guru/

ceuk agama 

najan jalma ayeuna can panggih 

sareng /teu nyaksian langsung 

ayana Sayidina Muhammad saw oge; 

ulah migawe salat fardu 

6 kali atawa ngan 4 kali 

da tuduhna 5 kali sapoe sapeuting 

najan beuki ge; 

ulah puasa wajib sabulan pinuh dina ramadhan diganti di bulan mulud najan resep oge; 

Ulah keur haji/umroh thawaf 

ngurilingan makam Nabi Muhammad 

najan magpang meungpeung di madinah oge 

jrrd hal nu ulah dilakukeun 

iwalti aya titahna/tuduhna.

Nu kaduana, 

Al ashl fi al-asy’yā (ghair al ibādah) al ibahah, 

illā idzā mā dalla al-dalil alā khilafihī

 

loba kapanggih 

dina ibadah ‘in/non formal’ 

nu ambahana leuwih jembar, 

misalna wae: 

ibadah Gawe 

rek dagang 

rek tani 

meunang asal ulah milampah nu dicegahna, 

rek susundaan 

rek aaraban 

rek kawas bule meunang wae 

malah ngabeungharkeun rasa jiwa 

asal ulah milampah nu dicaramna.

Rek hitut ditarikeun 

rek dipelepeskeun meunang wae eta oge 

(sing jadi) ibadah (ka maha suci) 

asal ulah milampah nu dicegahna.

Rek diuk 

rek nangtung 

rek ngajengjehe 

rek lumpat 

rek puasa 

rek ngabeuti 

rek ngabuah 

rek ngagugulung keris nyorendang kujang ngeukeuweuk HP 

keur urusan elmu 

atawa kahirupan sapopoe meunang wae 

(ngan kudu pisan jadi ibadah) 

bari/asal ulah milampah nu dicegahna 

jrrd 

Jadi sakali deui, 

Rek nanahaon wae oge meunang 

(tapi kudu mangrupa ibadah 

ka maha suci) 

bari/asal ulah ngalakukeun 

nu diulahkeun/dicaramna.

Ngeunaan dua kaidah diluhur 

lamun ku urang diudag 

nepikeun kana hakekatna/kanyataana 

yen sagala usik malik 

keur ibadah ka maha suci, 

boh dina ‘formal’ atawa ‘in/non formal’ 

da euweuh bedana 

sarua sarua kudu manjing ibadah, 

tangtu barisaeun ngajawab 

ngeunaan/tarapis dina hal, 

misalna saperti kieu:

Kumaha nyahona 

lamun urang keur kababayan/kabelet 

hayang kabeuratan/kahampangan 

harita teh keur ibadah, 

lain nu diulahkeun ku nu maha suci? 

kumaha nyahona 

ibadah urang harita lamun keur ngambekan 

kaluar kajerona nafas, 

keur nulis keur nyarita, 

keur facebookan 

lain nu keur diulahkeun/dipiwarang 

ku nu maha suci-atawa 

saukur bakti kana nafsuna sorangan?

Tuluy,..

Kumaha ngabuktikeunana 

keur urang ayeuna pagawean maehan anak batur, ngarusak parahu alus batur, 

ngomean imah butut batur, 

nu dipidamel ku Nabi Khidir as 

mangrupakeun hal nu dipiwarang 

ku/ibadah ka maha suci;

kitu oge Sang khalilullah 

bade nelasan putrana 

cenah piwarangan maha suci 

sasat ibadah ka maha suci? 

Malah dilembur tangtung oge, 

aya kolot kolot nu legok tapak nyarita 

matak helok ka nu beda alamna: 

‘teu acan atos moyan teh aki, 

ayeuna parantos tabuh 10?’ 

jawabna 

‘ Acan nunggu titahan ti Allah 

da dewek mah tuhu moal indit 

lamun can dititah 

(kaidah ka hiji), 

ayeuna mah kieu we da teu dicaram 

(kaidah ka dua). 

Beu, 

kumaha rupa kitab rengkol ayatna?

Ari urang, 

leuleutikanana dina lembut lembutna, 

naon tuturkeuneun 

lamun keur mireungeuh miharsa 

ngerejet TARIMA 

supaya jadi ibadah ka Maha suci 

manjing ayat 

wa’bud rabbaka hattaa ya’tiyakal yaqiin 

(Batu (15):99) 

bakti tugtuhu nepi ka yakin enyana? 

Embung kasebut nu teu boga rasa rumasa 

ukur bakti kana rarasaan 

pangrasa nafsu sorangan.

Keun heula ulikan 

dina hakekat/nu saenyana, 

ayeuna urang ngoraan deui 

ka nu sok kapanggih sapopoe 

di alam ‘relative’ 

pada jalma heula yen tangtu 

lamun boga kasadaran/

pamahaman/

kamampuh 

yen usik malik sakabehna teh ibadah, 

Moal aya bijil caritaan nu mungkul kawas kieu:

‘Dahar heula maneh 

meh kuat shalat ibadah ka Allah’ 

padahal dahar teh 

nyatana ibadah, 

shalat ge (sarua) ibadah. 

Jigana maksudna mah 

dahar heula sing jadi ibadah 

jeung supaya oge engke bisa/kuat 

ngalakukeun ibadah nu lain 

nyaeta shalat.

Jadi kuduna aya oge titahan lain 

ka barudak teh: 

‘shalat heula maneh 

ameh engke bisa ibadah baranghakan’ –dahareun/bisa dahar sabagian rijki nu dipasihan ku pangeran mun pareng do’ana 

dina keur diuk waktu shalat –

warzuqni- 

dikabul ku pangeran.

Ari dahar sing jadi ibadah, 

misalna, sok diajarkeun ku kokolot kokolot lembur tangtung mah ngaliwatan ‘obrolan‘ 

teu siga kawas kieu: 

‘ieu kadaharan hareupeun maneh keur naon?’ dijawab ‘kanggo dituang/diteda’, 

‘Naon sabab rek didahar?’ 

‘salian ti hoyong/lapar teh, 

nyaeta supados janten kiat sehat wareg’. 

‘Tah lamun kitu maneh ulah asal dahar 

tapi kudu bisa nyampurnakeunana 

sabab ari asal ngahakan mah 

can tangtu jadi kulit jadi daging, 

sok jadi panyakit, 

sok jadi mawa nafsu goreng, 

sok jadi teu nangan kateluh kukejo, 

Sok atuh program/do’a-an 

supaya kadaharan nu asup teh 

jadi kaalusan ti maha suci (razaqtanaa) ngajauhkeun maneh tina siksa 

(panyakit naraka jrrd adzab)’. 

Tuluy ditanya deui, ‘

Tah lebah mana ibadahna maneh 

ka nu maha suci 

lebah dinya/mun keur dahar kawas kitu? 

(jarang aya nu bisa ngajawab 

pananya nepi ka kieu –

komo bari jeung prakna- 

najan kalimat saencana 

geus mere tuduh pakeun jawabna).

Satuluyna,…

Tangtu moal aya nu nyarita/ngado’a 

‘gusti pasihan abdi rijki/

harta banda dunya barana 

ameh tiasa/bade ibadah ka gusti’. 

Ieu tanjakan ti jalma 

nu keur poek hate 

atawa bisa jadi ukur keur hayang harta, 

nyarita kitu na teh 

ameh kasebut alus sungut mungkul. 

Naha? 

dumasar kana ayat diluhur 

tangtu neangan harta/rijki nage 

geus (kudu manjing) ibadah; 

pas kabeneran boga harta, 

hartana teh nambahan ka manehna 

jadi pagawean/hal nu kudu diibadahkeun; 

Kateubogana harita ge (kudu jadi) ibadah, 

riweuh gawe (kudu) jadi ibadah jrrd nu aya. 

Jadi, 

nanahaon masih make tanjakan 

yen karek lamun boga rijki arek ibadah. 

Nu kitu kasebut oge 

nu keur samagaha pikir. 

Hayang ibadah nu manehna 

teu bisa/keur teu daek, 

atawa nyahona meureun 

ibadah teh ukur nu sok idek liher di masjid, kaayaan manehna sorangan 

NU AYA di manehna harita 

pasihan ti maha suci 

ditambelarkeun 

teu diibadahkeun 

teu jadi ibadah 

kalahka ngalamunkeun nu euweuh.

Kitu oge kekecapan2: 

‘Engke lamun geus salse/pensiun 

rek husu ibadah’, 

meureun rugi pisan 

kangoraana 

kasibukanana 

sama sakali lain ibadah/

teu jadi ibadah keur manehna; 

‘Boro boro tahajud euy 

ieu teh da kudu nyupir sapeupeuting’, 

meureun bingung pangrasana 

yen nyupirna lain ibadah 

da kumaha ngaibadahana 

nyupiran mobil hayang gancang tepi ka nu dituju tapi kudu mangrupa ibadah ka maha suci-

jadi nu maha suci teh 

kawas nanahaon atuh?; 

‘Engke mah lamun libur/cuti 

arek puasa 

arek ngelmu nambahan/ngaleketkeun ibadah, 

da ayeuna mah kumaha atuh euy riweuh’ 

pohoeun 

yen gawena/sakolana 

kariweuhna teh 

(kudu mangrupa/sing jadi) ibadah oge; 

‘Tong nyanyi wae atuh 

maca maca qur’an ameh jadi ibadah’ 

pohoeun yen maca qur’an ge 

sok dilagukeun/

aya ‘iramana’ 

jeung deui nyanyi ge ibadah-

kudu jadi ibadah 

najan tangtu beda kelasna 

henteu pacorok; 

‘Ah da kumaha atuh sakieu kakolotana 

teu bisa ibadah kawas baheula’. 

Justru kitu geus kari ngeunahna 

teu loba teuing nu kudu diibadahkeun; 

‘Atuda gering ripuh 

rek kumaha bisa ibadah, 

padahal aya ngeunahna batur mah 

kudu nangtung ruku sujud 

ieu mah cukup ku ngagoler/diuk wae 

cukup rindat matana 

usik hatena mungkul pakeun dibaktikeun 

ka maha suci 

jrrd ….. 

Moal euweuh 

tuliskeuneun 

lampahkeuneun 

sasat kabeh usik malik 

salila hirup jeung paehna 

kudu sarua jadi ibadah. 

Nu penting mah 

tinggal daek tatanya 

bari jeung prakna ka nu geus tapis 

kumaha sangkan sakabeh manjing ibadah 

ka tukang/ahli ibadah tug tutuhu 

ka nu maha suci 

lain ka salian ti eta.

CARA NGANEPIKEUN/

NGALAMPAHKEUN 

IBADAH 

DI LEMBUR

Sajalan jeung kaidah ushl fiqh diluhur, 

luluhur luluhur sunda 

nu bijaksana para satmata 

ulama nu seubeuh mikiran agama 

anu aya dilembur lembur 

tangtung dina prakna, 

nu kapanggih mah, 

tara nyamputkeun 

elmu ulikan kasundaan/kaislaman 

(wilayah in/non formal) 

jeung sareat ritual formal 

nu geus mapan 

najan bari rupa rupa madzhabna. 

Tapi kabehana ge 

kelas harkatna euweuh bedana 

nyata mangrupa ibadah -

kudu mangrupa ibadah- 

ka nu maha suci 

Allah swt 

tara ka salian ti eta. 

Nuhiji mah tara dipigawe 

naon wae salian ti nu geus aya tuduhna- 

mun dipigawe sok diseut bid’ah 

nu diulahkeun tea, 

nu kadua mah wenang 

naon bae oge asal teu milampah nu dicegahna.

Biasana pola na teh: 

Digedekeun/diasakeun heula 

kana ibadah ‘formal’ –

kayaning rukun islam & iman 

dina sareat- 

nu geus kabukti sareatna/jalana/metodana proven keur ibadah ti babaheula, 

nu dipamrih kabukti engkena 

bisa nyaangan 

jadi tuduh kana lampah ulikan ulikan/

lampah lampah nu laina dina kahirupan 

sangkan kabehanana jadi ibadah 

tug tutuhu ka maha suci Allah swt; 

Aya nu bareng periode/’yaum’-na 

ngan sok beda waktuna, 

beurang beurang di masjid 

ukur ngobrolkeun/lampah ‘sareat’, 

kapeutingnakeun sanggeus waktu sareureuh budak karek kana ulikan ulikan nu laina 

meh leuwih nyaangan lampah hirup hurip nohonan bakti diri ka maha suci 

di luar ibadah ‘formal’. 

Aya nu geus shalat fardhu berjamaah, 

tuluy ngabahas jeung meraktekeun eusi 

eusining qur’an dina pangkat ibadah 

nu leuwih jembar kayaning dina: 

silat, 

ngubaran, 

parijkian, 

panorahan, 

padikiran 

jrrd. 

Aya oge nu di masjid ngobrolkeun sareat; 

di imah, 

dikabuyutan, 

di leuweung, 

di gunung, 

di nu suni suni, 

sepi tinu pagaliwotana kahirupan sapopoe milampah/nyaritakeun/ngajarkeun 

ibadah ibadah lain 

kayaning katasaufan kasundaan jrrd 

make bekel sareat 

tur pakeun ngeuyeuban sareat. 

Kabehanana tara sugan nitah /nyontoan ninggalkeun sareat/formal 

atawa misahkeun 

ngabedakeun 

nganafikeun 

ibadah nu luar/salian ti ritual formal.

Matak di jalma jalma wijaksana baheulana 

(jeung tangtu ayeuna katut kahareupna) mah 

tara aya pasariwut pasea 

nu susundaan jeung iislaman 

da ibadah ibadah keneh 

asal ulah pacorok pacampur. 

Tara ngiruhan sareat 

tara nganafikeun ulikan ulikan susundaan/iislaman 

(misalna kasundaan katasaufan jrrd). 

Kabehana bareng 

silih bantu 

silih awaskeun 

silih ingetan 

selaras harmonis 

shaleh ibadah tutug tutuhu 

ngan ka nu maha suci.

[17/9 18:49] aji rasha: 

2. IBADAH JEUNG PAMUSRIKAN, 

DIMANA LEBAH LEBAHNA ? 

2. PAMUSRIKAN

Kaayeunakeun 

kusabab ‘misah’na 

cara nganepikeun ngeunaan hal 

”sagala ge ulah iwal ti nu aya titahanana/tuduhna; Sagala ge meunang iwal ti nu diulahkeun/dicaram, 

loba kapanggih dina kahirupan sapopoe 

utamana lamun urang keur susundaan 

kayaning: 

manggihan 

neangan 

ngulik 

ngaekspresikeun 

nganepikeun 

ngaapresiasi 

numuwuhkeun 

nyeungitan 

milampah nu aya hubungana 

jeun kasundaan 

boh budaya boh, utamana, kapribadian 

ulikan elmu sunda 

(kitu oge kana ‘modernitas’ 

nu dibawa ku ‘munding bule’) 

sok dinafikeun ku disingsieunan 

jeung di/kabebegigan ku caritaan 

nu dipahingkeun 

tina pamahaman ibadah ritual formal/’sareat’ nyaeta : 

utamana pamusrikan/ 

ibadah Lain ka maha suci Allah swt 

atawa bid’ah migawe 

nu euweuh tuduhna/titahanana 

(kaidah ka hiji) 

nu ngajadikeun aya, 

lamun teu kasebut loba, 

urang sunda nukeur susundaan 

jadi:

Ngajauhan ‘masjid/sareat’, 

ngewa/

anti/

teu paduli kana islam 

atawa misahkeun maneh tina kaislaman mopohokeun 

yen sababna islam ditarima/dipake baheula 

ku luluhur teh sabab 

sareatna pangparatan hakekat 

bari teu kudu jadi arab/

tetep nyunda/

teu kudu anti ‘modernitas’, 

matak tara/tong daek nurut kana fiqih-fiqih (pamahaman jalma dina ngahartikeun agama) 

nu lain pangparatan hakekat, 

kudu wae ninggang hakekat/kanyataanana 

tara ngandelkeun cenah :

Naon sabab islam dipake di sunda, 

na teu boga cecekelan sorangan?). 

Sabalikna, 

aya nu Embung, 

sieun atawa 

susulumputan milampah kasundaan 

da nyaeta sok/bisi/ngajaga 

tina dicap/dianggap musrik 

jeung milampah bid’ah poyokaneun/kamarginalkeun 

ku ‘urang masjid/sareat’ 

jadi we jati diri 

nu enya ngeunaan ulikan kasundaan teh 

hese neanganana 

da nyumput tara nembrak 

atawa kasundaan jadi barang aneh 

sabab geus lila tara dipake 

sabab sieun jeung embung tea 

mimitina nepikeun ka hese nyusudna 

salaku ulikan. 

Ari pareng aya/bijil nembrak, 

remen pasariwut jeung nu sada sunda 

tapi sundel da poekeun 

rumpu rampa keneh 

pikir jeung atina jajauheun 

kana moncorong gumiwang caang 

sampurna pikir ucap jeung lampahna 

salaku nu tug tutuhu tumut turut ka maha suci, 

kawas nu sada islam 

padahal eusleum 

jajauheun tina aslamtu 

numawa kasalametan 

karahayuan 

kaharmonisan 

kasampurnaan 

najan ngakuna mah (ukur tepi ka ngaku) abdi/tukang ibadah ka Allah-

Kawas nu siga ‘educated’ luhung elmu 

padahal setan logika mungkul.

Sabenerna mah teu kudu aya dua kajadian diluhur, tapi memang kudu enya enya jeung ati ati pisan ulah nepikeun ka tigebrus 

kana pamusrikan jeung bid’ah.

Matak ayeuna urang semplakeun deui 

waja tina ageman teh 

boh dina ngalakukeun ibadah ‘formal’, 

dina susundaan, 

dina naon wae lampah dunya 

nepikeun ka paehna 

kudu jadi ibadah 

bakti diri tutuhu 

ka maha suci 

lain ka salian ti eta 

ulah milampah nu dicegahna. 

Nepikeun ka lembut lembutna oge, 

dina ngerejet 

mireungeuh 

miharsa 

ulah asup kana pamusrikan 

sabab eta teh dosa nu pangede gedena 

jeung euweuh ampuna 

saencan ditinggalkeun/

teu dilakonan deui/

taubat (balik deui) 

ka ngan ibadah 

ngabdi bakti diri 

tug tutuhu ka nu maha suci (tauhid). 

Jeung lamun geus musrik teh 

kacida pisan sasar sasabna 

(Awewe, 4:116).

NA KUMAHA NU DIMAKSUD 

SYIRIK/MUSYRIK 

TEH ENYANA?

SYIRIK 

umumna nyaeta 

ngaduakeun (leuwih ti hiji) Pangeran. 

Nganggap pangeran boga /

ngabogaan atawa 

butuh/mikabutuh batur (syarik), 

jeung nganggap pangeran boga/

ngabogaan ‘saingan’ nu satara/

nu ngaleuwihan (andad).

Saliwat mah keur urang urang 

lamun ngadenge kekecapan 

syirik atawa musrik teh 

sok langsung kainget kana caritaan 

ka budak 

yen nu musrik 

(nu ngalakukeun syirik) teh

Nu ibadah 

bakti ka berhala 

kawas patung arca jeung sarupa ti eta 

(Para Nabi (21):52-65).

·Sujud 

ka sarangenge ka bulan 

(diwincik, 41:37) 

sawarna jeung eta 

tangtu kaasup sujud bakti nyembah –

migusti- kana barang barang 

nu dianggap ‘aheng’.

Ngajadikeun jin-nu gaib gaib- 

jadi sarekat Allah 

(ingon-ingon, 6:100).

Mangerankeun ka jelema2 

nu dianggap aheng jeung luhung 

(Awewe, 4:171) 

kaasup - boh nu hirup keneh atawa geus maot.

Tapi tangtu ngeunaan pamusrikan 

nu disebut diluhur mah 

gampang ngabedakeunana 

dina lampah bakti tutuhu sapopoe.

Kitu deui anggapan 

yen Allah/pangeran 

boga anak boga pamajikan 

terus konsekuensi logisna 

pangeran jadi tilu jrrd 

(5:116; 6:102; 16:57; 19:82-92) 

oge geus jelas beda/ulahna-

malah diurang mah teu kagok, 

teu riweuh nyebut aya batur nu jadi Anak Allah, sorangana we ngaraku jadi Allah -

kawas fir’aun baheula- 

meureun leuwih ngeunah lieurna, 

teu bakti/ibadah/migusti deui ka batur 

saluaraeun manehna.

Najan tiap jalma ayeuna 

nu masih keneh siga nu dicaritakeun diluhur 

mun ditanya naha laku kitu 

pasti ngajawabna eta mah saukur simbolis, pengarah, ngagampangkeun hiji abstraksi, perantara, ’sareat’mungkul, 

’membumikan tuhan nu abstrak’, manifestasi/perwujudan (jrrd) 

tina bakti ka nu murbeng alam. 

Embung disebut bodo bodo teuing 

ngaduakeun pangeran jeung patung, 

panonpoe, bulan atawa jin, nu gaib gaib, 

nu boga sifat basariyah jrrd. 

Jadi, teu pati guna teuing dibejer beaskeun 

kitu kieuna kacape cape.

Ayeuna urang ome pamusrikan 

nu rada leuwih hese –

mun teu kasebut hese pisan- 

nyingkahanana ku sorangan 

tapi bari rada gampang nangenanana/

gampang mere labelna 

mun kalampahkeun ku batur 

nyaeta:

Jalma musrik teh 

nu ngajadikeun ulamana/guruna 

jadi Pangerana/gustina 

(9:31). 

Nu karieu barakti turut tumut tutuhu 

ka ulamana/guruna 

jeung kana naon wae 

ti ulamana/guruna 

ngaenyakeun nurut teu minge. 

Tuluy,

Jalma musrik teh 

nyatana jalma jalma nu ngabengkahkeun agemanna nepikeun ka jadi golongan2/

aliran2/

isme2/

brotehrhood2 

masing masing reueus 

agul ku nu aya di paguron/ 

aliran/komunitas maranehna 

(30:31-32; 23:52-53) 

tah pan di urang ge 

boh nu iislaman 

boh nu susundaan 

pasariwut loba loba golongan/

aliran bari misah misahkeun maneh 

aragul rareueus ku ageman 

nu aya di manehna 

nu beda/asa leuwih alus leuwih enya 

ti nu aya di batur. 

Malah-malah, sok kasebut loba loba

Jalma nu ti gebrus 

dina syirik teh 

nyaeta

nu leuwih mikacinta harta, 

pagawean, 

dulur, 

pamajikan, 

anak, 

kolot, 

oge naon naon nu dipikameumeut ku maranehna, sasat leuwih mikacinta nu lain (andad) 

ti batan mikacinta pangeran 

(9:24).

Ngan lamun ka batur 

ku urang disebut laku kitu teh pamusrikan, 

najan aya caritana dina qur’an numutkeun Allah, meureun wera malah boa moal tuluy hahadean, papaseaan, musuh saumur umur. 

Tapi hal hal saperti nu disebut diluhur 

mun keur kaalaman ku sorangan 

hese sadarna 

beurat leupasna 

najan nyaho 

yen musrik teh moal dihampura 

ku Pangeran 

jeung siksana teh 

perih pisan nyelekit enya.

Nu panuntungna mah,…

Pamusrikan nu samar ipis bedana 

hese pisan ditinggalkeuna 

nu tuluy wae ngilu kababawa 

ngukuntit salila usik malik 

jadi jelema najan 

susundaan, 

iislaman, 

shalat rajin, 

puasa leket 

ceuk rarasaanana atawa 

nu ceuk batur geus di pangkat ulama luhung Satmata oge komo keur urang jalma biasa. Nyaeta:

Nu ngajadikeun 

hawa nafsu kajelemaanana 

jadi pangeranana/gustina/ALlahna.

ara’aita manittakhada ilaahahuu hawaahuu’ (Pamisah (25):43).

Hartina 

nu bakti tumut turut tug tuhu 

kana hawa nafsuna sorangan, 

ngajadikeun hawa nafsuna jadi gustina(andad). catetan: 

Pangeran/Gusti teh 

nu kudu diturut piwaranganana/cegahanana 

jadi mangeran/migusti bisa ngandung harti 

nurut tumut bakti tuhu kana piwarangan/cegahanana.

Naha?

Nyatana apan 

kajelemaan teh nafsu, 

pikir akal teh bijil ti nafsu, 

Qalbu teh pan owah owah dina sir kanafsuan. 

Moal lampah 

moal usik malik 

mun teu nafsuan, 

dahar 

nginum 

sahwat 

kiih 

ngising 

nafsu, 

moal mikir 

moal ngakal 

moal boga angen angen 

mun lain di kanafsuan, 

moal jadi jelema mun teu boga nafsu kajelemaan. Jadi pagiling gisik terus jeung nafsu 

moal pisah pisah satungtung aya 

dikajelemaan 

jadi jelema.

Cobaan shalat teu nafsuan 

moal meta moal usik usik acan, 

jadi shalat teh 

hasil/pagawean nafs kajelmaan 

ku jelema mah - 

beda lamun nu shalatna 

Allah atawa malaikat. 

kusabab eta 

coba saliksik sing telik 

ka sorangan di sorangan, 

Naha migawe shalat harita 

sabab nurut nafsuna nu hayang shalat? 

atawa nafsuna nurut kana titahan pangeran supaya shalat/puasa. 

Nu kahiji nurut-

sasat mangeran/migusti-kana nafsu sorangan. 

Nu kadua 

nafsuna nurut kana titahan pangeran. 

Ngan didieu beuratna/samarna,

Kumaha ngabedakeunana 

nganyahokeunana 

dina waktu ngan sababaraha ‘detik’ 

owah owahna sir dina ati, 

lamun can meunang perbuka ebreh wajahNa (wajhilah)?

Matak bisa kaharti 

dina shalat fardhu ge 

kudu wae aya niatna/itikad heula, 

kudu wae khusu ngado’ana, 

make formulasi basa/kecap kecap 

nu geus proven tibaheula 

dipake ku Rasul Allahna - 

ulah nyieun sorangan,

kudu bener peta petana 

ulah meta sakahayang sorangan, 

ibadah nu pantang migawe 

lamun euweuh tuduhna. 

Ameh bener ngalelempeng kanafsuan 

ulah mangerankeun/nurut kana nafsu sorangan 

(di lembur mah kabedakeun ku isitlah antara make/numpakan nafsu jeung 

kagugusur nurut mangeran kana nafsu).

Biasana pamusrikan henteuna teh 

leuheung ngeunaan hayang shalat fardhu-pagawean alus, 

kumaha lamun dina angen angen? 

dina sahwat? 

dina dahar? 

Ngaroko - ‘

Addicted Narkoba mah meureun leuwih jelas’-? 

Gawe? 

neang elmu? 

Keur parebut pagetreng 

jeung batur dina dudunya? 

Ngabaktikeun kasusah kasenang Jrrd 

Kumaha lamun kawas Sang Khidir as 

dina maehan & ngarusak keur urang ayeuna, 

jaba urang mah jalma biasa? 

Mana nu nurut make nafsu 

mana nu kagugusur bakti kana nafsuna? 

Mana nu mangeran kana/ngajadikeun nafsuna jadi pangerana dina usik malik, 

mana nu usik malikna 

dumasar kana titahan/tuduh Pangerana? 

Lain jawabeun/sangkaan/penilaian 

nu harung gampung sungut mungkul 

lain hasil tilikan nu deet deet 

sabab ieu mah 

pamusrikan patohidan 

nu pagiling gisik 

dina jajaten jajatian sorangan.

Kitu oge 

ngeunaan pangeran nu jadi kakait ati/pikir,

tujuan shalat/do’a 

bakti sumembah dina usik malik 

salila hirup jeung/ tug nepika paehna.

Pangeran nu kasebat 

nganggo basa arab 

Allah-nu cenah 

jadi pamsurikan urang Arab jahilliyah. 

Allah teh dzat 

nu euweuh upamana 

Suci sareng Agungna teh 

maha pisan bari gaduh asma alhusna ngaratus katut af’alna nu tanpa wilangan. 

Eta hasil nu kabaca/kadenge 

tina kitab mushaff utsmani/

ti guru/ti ulama- 

ku nu parinter dina agama Allah teh 

dipasihan ‘gelar’ SWT 

ameh ngingetan/puguh bedana 

nu kumaha Allah teh.

Nya ku katerangan eta 

dilakukeun ‘conseptualised’ 

pemodelan anggapan 

pemahaman nu jadi kayakinan disorangan ngeunaan eta katerangan. 

Bisa bener bisa salah ngahartikeuna - 

komo nu ukur aya dina nyangka 

ngaduga ngira ngira/meureun 

ngeunaan Allah 

dumasar kana katerangan tina ayat 

(nu ngaduga ngira ngira Allah baladna setan). 

Najan kitu, 

ari ngahartikeun, 

pamahaman, 

kayakinan, 

konseptualiasasi, 

nyangka ngaduga ngira ngira 

bijil ti nafsu kajelemaan. 

Dina salahna 

jadi mangerankeun kanu lain pangeran, 

mi Allah lain ka Allah 

najan asa enya.

Tapi, leupas tina bener salahna 

mi Allahna ka ‘Allahna’ teh 

sabenerna nurutkeun kajelemaanana 

da jelema sasat bakti tug tutuhu nurut tumut mangeran kana nafsu kajelemaanana 

pangrasana sorangan ngeunaan Allah, 

lamun can meunang perbuka ebreh wajahNa (wajhillah) .

Jadi Mana nu mangerankeun nafsuna 

ngeunaan Pangeran (syirik)? 

mana nu ku nafsuna mangeran ka Pangeran?

Lain jawabeun/sangkaan/penilaian 

nu harung gampung sungut mungkul 

lain hasil tilikan nu deet deet 

sabab ieu mah pamusrikan patohidan 

nu pagiling gisik dina jajaten jajatian sorangan.

Kusabab katerangan diluhur, 

teu salah lamun nu mangerankeun 

nurut tuhu migusti kana nafsuna sorangan 

ieu nu ngajadikeun ayana syirik syirik nu laina. 

Jadi nyembah berhala teh 

nyatana berhala dina nafsu sorangan, 

leuwih micinta dunya 

tibatan ka pangeran 

sabab mangerankeun hawa nafsu sorangan, 

nurut mangeran ka guru/ulamana 

sabab nafsu sorangan, 

ngabengkahkeun ageman 

agul ku ageman sorangan 

sabab mangeran kana kaagul nafsu sorangan, nyieun pangeran keur manehna sakahartina 

sabab jijieunan pamahaman hawa nafsu sorangan, 

lain saukur dina nangenan aya 

nu susundaan atawa 

nu iislaman mungkul, 

nu kitu moal leupas salila di kanafsuan 

hawa kajelemaan 

lamun lain ku perbuka.

Ieu ge nuliskeun papanggihan 

nga upload ngaguar guar naha sabab: 

make nafsu numpakan nafsu 

da kudu ku nafsu ameh jadi tapak 

salaku nu katitipan 

ngagolangkeun nafsu kajelemaan 

titipan ti maha suci, atawa 

ukur nurut mangeran kana nafsu sorangan 

pedah hayang/kudu nuliskeun ngaguar guar 

sabab perlu atawa ngandel kana nafsu jamak 

bisi ‘perish’ lamun teu ‘publish’? 

Ana kajawab kaburu lain 

da lain dina alam susundaan iislamanana mungkul tapi pagiling gisik 

dina jajaten jajatian sorangan 

unggal usik 

unggal ngetug 

unggal ngarenghap. 

Jadi mending dianggeusan 

bisi keuna ku poho ireug katalingeuhan.