kaweruh

Bebuka

Rinengga sagunging karahayon

Nuwun awiyosipun :

Jer jejering kita manungsa gesang, kita kedah enget dhumateng gesang kita pribadi, kita kedah tresna dhateng sesami, kedah percados dhateng gesangipun tuwin batosipun piyambak-piyambak. Sampun ngantos gugon-tuhon, sampun pitados memuji kayu-watu utawi nyembah brahala sesaminipun.

Kedah nyantosaaken kapitayan dhumateng badanipun tuwin batosipun piyambak.

Menggah wontenipun gesang kita punika, mboten saged dipun pisah-pisahaken kaliyan wontenipin Gaib, inggih punika Gaibing Gusti Ingkang Maha Suci ingkang langkung samar.

Mila ing ngriki nuwun-nuwun sewu, dene kumawantun kula badhe nyingkap wewados kahananing dumados, ingkang kula gelar wonten ing salebeting Primbon punika. Supados pada Kadang Warganing Ngelmi Kabatosan sampun ngantos kerut dhateng panasaran.

Awit sapunika taksih kathah sanget para Sadherek ingkang saperangan, Para Paguron medhar Ngelmi Jaya-Kawijayan/Kanuragan ingkang dipun tanem dhumateng para Putra-Putri sanesipun ingkang kerut dhateng ngelmi maksiat kasebat ing nginggil.

Ing ngriki perlu kula terangaken, menggah dunungipun ngelmi Jaya-Kawiyajan/Kanuragan punika : kula wastani ngelmi karang, tegesipun : Kula umpamekaken sekar boreh, utawi kaca linabur wedhak umpaminipun.

Awit mekaten  :

Ngelmi Jaya-Kawijayan/Kanuragan punika wonten sanjawining kulit daging. Mila kita ingkang sampun ngagem ngelmi tuwin elmi kebatosan, utawi malih ingkang sampun percados kaliyan badanipun piyambak-piyambak sampun mboten mbetahaken, awit mboten wonten damelipun.

Pramila ing salebeting Primbon punika badhe kula gelar sejarah wontenipun ngelmi Jaya-Kawijayan uger naming dipun sumerepi kemawon, wewaton wosipun sampun mangertos ingkang dipun artosi.

Naming ing ngriki kula nyuwun mawantos-wantos, sampun ngantos dipun lampahi saestu.

Awit sampun kula terangaken ing ngajeng, menggah ngelmi Jaya-Kawijayan/Kanuragan punika kula umpamekaken sekar boreh. Lajeng dipun wastani ngelmi karang, tegesipun mboten saged langgeng.

Mila kedah ngudi ngelmi ingkang sanyatanipun, bilih pinanggih pancabaya sampun ngantos ambalenjani.

Semboyanipun:

1. Sampun pegat katresnaning batin.
2. Sampun pegat kaprayitnaning batin.
3. Kedah percados dhateng badanipun piyambak.

Rawe-rawe karantas, malang-malang kaputung. SOCA LUDIRA lebur dening pangastutiningsun.

(kalis sakehing bebaya)

Guru Mirunggan

Ttd.

S. SOERYOSANDJOJO.