LAYANG CAANGNA HIRUP

Minggu 24 April 2022

CIPAKU DARMARAJA

Cicingkeun - 

Pageuhkeun - 

Kukuhkeun

 LAYANG CAANGNA HIRUP

Bab ieu pikeun sakabeh  manusa anu  butuh  kana  didikan jeung atikan 

hiji elmu pikeun nganyahokeun  makna-makna  jeung   omongan  anu  ngandung  hikmah. 

Sareng   panuntun  supados  eta  manusa  teh  bisa  paham  kana  kabeneran  jeung cerdas. 

Gunana oge pikeun nangtungkeun kaadilan jeung kajujuran kana dirina. 

Muka  kana  kacerdasan  diri  pikeun  manusa  nu  pinuh  ku  pangalaman  jeung panemu  jeung  ngajarkeun  kabijakan  pikeun  anu  ngarora.  

Mudah-mudahan ngajadi hiji kahadean, dimana nu aranom ge diajar 

kana bab kabijakan diri jeung meunang  bahan pertimbangan anu sae pikeun ngarti  jeung  ngahartikeun  

bab perjalanan  hirup anu  pinuh  ku rupa-rupa  masalah.  

Mudah-mudahan paribasa jeung siloka manusa  

nu  bijak  bisa  nungtun  urang  balarea ka jalan anu dipika ridho kudirina jeung Gustina, 

sieun kana  salah jeung  hayang  manggih bener. 

Eta modal urang mimiti muka atawa nincak kana bab ieu. 

Manusa nu bodo bakal moal  beuki  kana  mikir  jeung  ngahinakeun  kana  jalan  

nu  bener. 

Nyela  kana didikan diri. Sarua jeung mohokeun kana nu aya dina jero dirina nyaeta hiji rasa nu mulya. Pinuh ku lautan elmu jeung ma’rifatna diri nu hakiki.

saeutik kudu mahi

loba kudu nyesa

mun mahi pikeun diri

aya nyesa pikeun sasama

nyanggakeun sadayadaya

teu rek ngaku

teu rek ngaboga-boga

ngan mun dekil 

sing manggih cai

lapar sing manggih dahareun

galah cedek papas runcing

moal rek leuleuwiheun

mun ala kadar na

caang damar sing jadi panggeuing

kundangeun urang sarerea

ulah nafsu diakheratna

ulah nafsu di alam dunyana

salamet sakawasana

langgeung salalawasna

atining hurip

PAMUKA

Muji syukur urang sadaya 

ka diri urang pribadi. 

Nu masing-masing masih keneh tiasa ngarasakeun hirup waktu poe ayeuna.

Muji syukur khususna abdi narimakeun hirup ku hirup kiwari dina kaayaan sehat sentosa kucaang  hate, caang pikir, seger budi pakarti, herang manah,  ku ngayogana  hirup  nu  sajati.  

Dina kandungan  tiap-tiap  manusa  nu  peryoga  kana dirina, 

munjung kana rasa  hirup 

nu asli 

nu parantos wawuh jeung nyaksian kana jero hirup 

nu haq.

cunduk kana waktu ninggang kana mangsa.

ka jurung ku jorojoyna hate.

medarna manah.

abdi niat mukasafah 

makna hirup.

nu ku abdi 

kahartos.

katingali.

kareungeu.

kaambeu.

kabuktoskeun.

Hapunteun  sateuacana  bilih  tina  muka  bab ieu aya  keneh  atanapi  masih  seuer kakirangan tina bahan nu aya dina manah abdi. 

Jeung kirang imeut na akal abdi dina nampi rasa nuntun abdi.

Dugi  kana  rengsena  ieu  bahasan. 

Hapunteun sakali deui ti pribadi. 

Ka para sesepuh 

nu  langkung  seueur pangalaman dina muka atanapi  nyeratkeun sagala anu ka sirat dina jeroning ati. 

Medarkeun sagala lalakon kuluhungna elmu jeung jerona  pangarti. 

Hatur  nuhun ku sadaya-daya. 

Mugi naon anu bade ku abdi dibuka aya manfaat ka diri. Deungeun pikeun eunteung bae 

nu lian pikeun tauladan nyanggakeun.

ayeuna kantun 

badan sakujur

bade nyanggakeun ka gusti

rek dihideungkeun, 

abdi luas

rek dibereumkeun, 

abdi nampi

upami rek teras abdi hirup, neda hurip

sanaos satungtung buuk

neda sahurip sadami

caang padang narawang

hirup teu katungkul ku pati

tapi hirup hurip tunggal

tunggalna abdi di gusti

ti luhur sahibas rambut

ti handap sahibas dampal

adeg-adeg abdi gusti

tangtung na gusti abdina

abdi tunggaling gusti

gusti nu di ahub tanjung

abdi nu wedi widi

widi napaan anjeunna

da ku dunya teu ka teupi

ku badagna sok bengbatan

sugan teupi lahir bathin

rep sirep sa kujur tangtung

rep sirep di sanubari

rep sirep sinuku tunggal

kabeh tunggaling pribadi

yaiku sang ngawe padang

teka maring sun sajati

laa ilaah ha illallahu

gusti kuring nu sajati

ora ana kang sinembah

anging ingsun kang dumadi

sira ingsun

ingsun sira

sapadamian ngajadi.

pangajen aji wiji

wiku wastu kancana

PANGULAS

Hirup

Naon eta hirup? 

Aya nu nyebatkeun yen hirup teh eusi. 

Hiji kanyataan yen hirup eusian sakabeh ruang tempat jeung waktu. 

Hirup ngeusi kana sakabeh kahirupan nu aya. 

Hirup teu aya rupana, 

teu aya bauna jeung 

teu aya warnana. 

Hirup ge teu aya sorana. Hirup eta mandiri  

teu keuna kana ruksak, 

teu bisa dicabak, 

teu bisa digambarkeun. 

Eta gambaran  sajatina hirup. 

Aya anu nyilokakeun  yen hirup eta Hihiji rupa-rupa.  Jadi  dimaknakeun  yen  hirup  teh  hiji  

ngan  nyurupna hirup  eta  kana  hiji  wadah  ngajadi  rupa-rupa,  

jadi  tiasa  dihartikeun  yen  hirup boga kahayang pikeun nampilkeun atanapi 

ningali dirina 

maka hirup butuh 

ku wadah kasar 

ku lantaran hirup aslina mah halus atawa lemes pisan. 

Bener upami kitu mah, upami aya nu nyebatkeun yen hirup teh nyaksian dirina ku hakekat diri pribadina  sorangan 

supaya  tetep dina  hakikina  atanapi kalanggengan sajatina diri. 

Hirup oge dihartikeun 

teu keuna atanapi 

teu ka tungkul ku pati 

sabab lamun hirup keuna 

ku pati 

eta lain hirup. 

Di dieu makna hirup langgeng salalawasna 

teu kena  ku robah,  

ku polah,  ku misal,  

jadi hirup  teh  kudu  pasti.  

Hirup  ge dimaknakeun 

boga rasa 

jadi aya harti yen 

wujud hirup nyaeta rasa atawa 

pancaran dina  hirup  teh nyaeta  

rasa  hirup  

ibarat rasa, 

gede  tapi  leutik,  

leutik  tapi gede. 

Hirup, rasa, jeung wadah 

teu kahalangan ku waktu ngan supaya eusi jeung wadah alus  

atawa   

sampurna hirup bakal 

nga robah waktu, 

ngarobah cuaca, 

ngarobah kaayaan 

nu leuwih alus, 

leuwih sampurna.

rep sirep sakujur tangtung

rep sirep di sanubari

rep sirep sinuku tunggal

jeroning ati nu suci

jeroning ati nu mukaha

kumelip bintang di langit

mararay bulan opat welas

nyarorot cahaya panon poe

nyurup dina curugan

bray caang narawangan

katumbiri pinuh ku widadari

rupa-rupa cahaya 

rupa rupa warna

kabengbat 

ku welas asihna diri

diri manusa nu sajati

lat  hilang buana sajagat

dat.. 

ngancik jeroning 

cupu manik

les  sakabeh alam corengcang

bararay, buriyal,bunceulik nur sajati

sing ngait kana ati

gusti nu teu jauh jeung diri

sing kapi ati ku diri

emut teguh kana jangji

jadi saksi nu sajati

---------------------------

tunggal tan tinggal

lawan ing pasti

roro pan tan roro

lir jiwa tinon lawan ragane

katon tunggal ke tinggal 

ke kalih

mangke ana mami

lawan gusti ning sun

tan kena ning pisah

syang lan ratri

tan syah awor winor

angemban ingemban salawase

amuruki osik eneng mami

awisik awisik

akeh bekti lulut

adepna mukanira iku

marang ing sang katon

hiya iku kabeh rarahine

angalingi rahining dumadi

rarahi kang luwih

sang katon sa wegung

pengetining sun

ing sira ra wujil

den dat na

urip inaneng donya

jiwa sumambarange gawe

kaweruhna den estu

sari ranta pon dudu jati

sing sapa pun iku

weruh rekeh ing sarira

maka sangsat

weruh sira

maring hiyang widi

iku marga utama

serat centini

ra wujil

"rahasia diri manusa" samemeh  urang muka  kana hiji pangarti nu bakal nuduhkeun  kana  eusi  jerona  manusa  urang  mimitian  ku  unggelna siloka :

teangan  

tapak  meri  ngojay  di cai, tapak  bango di  awang-awang 

bebek ngeyepek, 

soang titeuleum 

bancet rarecet, 

bangkong ngaheumheum 

di jero liang 

masih  loba  siloka 

nu nuduhkeun  kana 

nu bener  

ngan  hanjakal  manusa ayeuna leuwih resep  

kana raramean 

samar ku dedengean 

samar ku tetempoan 

hal ieu teh kakara saeutik pituduh nu muka  kana jalan pikeun mukakeun 

rahasia diri  manusa.  

Lain  saeutik  manusa  

nu  teu  merhatikeun  kana  hal  ieu  sabab memang  geus  kitu  awalna,  

moal  waka  beuki  lamun  can  ngasaan,  

moal  waka hayang lamun  can  dituduhkeun, 

moal  waka  muka mun can  kapikir, 

hayam  jago kongkorongok dina jero endog.

Pileuleuyan, 

sapu nyere pegat simpay. Pileuleuyan, 

paturay patepang deui. Hayam hideung 

endogna  bodas,

cing naon tah  silokana  eta kalimah. 

Urang kudu mimiti diajar mikir kana pihartieun eta kalimah. 

Hudangkeun 

rasa kanyaah, 

rasa bogoh, 

rasa deudeuh, 

kana  diri urang pribadi. 

Euweuh nu nyaah 

ka diri urang salain 

diri urang. 

Euweuh  nu daek hook  

ka  diri urang  salain 

diri urang pribadi. 

Pertahankeun 

eta sifat asih ka diri 

ku sakuat tenaga, 

sakuatna nyawa, 

sakuat jiwa 

supaya kaluar eta 

hiji rasa nu sajati 

nu asli dina jero diri manusa nu sebut 

Al Haq. 

Nyaeta benerna 

diri  manusa nu pasti atawa  disebutna 

sari sarining rasa nur sajati, maksud dina siloka nu dibabarkeun di payun tiasa digambarkeun ku mang rupa-rupa gambaran 

ngan urang hartikeun kana nu pang gampangna bae.

Tapak meri ngojay di cai, 

ari tapak teh lalakon, 

ari meri teh urang, 

ngojay the mentas. 

Cai teh asalna  manusa atawa cirina manusa. 

Jadi maksadna teh 

asal manusa teh ti mana? 

Ti saha? 

Ti mana kaluarna? 

Saha nu medalkeun? 

Ku Kersana saha eta manusa ngawujud? 

Saha kudratna manusa? Saha mawujudna manusa? Jeung sajabana, 

rupi-rupi pipikiran teh 

mimiti tatanya ka jero 

diri pribadi.

Tapak bango 

di awang-awang, 

maksadna nyaeta 

teangan asalna kecap, dongeng jeung carita. Supaya urang  ngelingan 

ka diri teh 

ulah saukur ceunah jeung saukur beja ti batur. 

Ti mana asalna  sora teh, naha bisa ditewak atawa dicekel eta sora teh? 

Cing saha nu bisa ngaluarkeun sora teh? 

Cing saha nu boga sora dina  jero diri manusa teh? 

aya  naon dina diri manusa teh mangkana 

bisa soraan 

bisa nyarita, 

bisa ngucap kitu, 

bisa ngucap kieu 

bijil sora teh ti saha?.

Bebek  ngeyepek, 

eta teh 

usik jeung malikna diri urang ku sifat badan.

Soang titileum, 

tah eta 

sifat jeroan urang 

nu mimiti ningalian 

ka jero dirina 

pikeun ngawawuhan jero dirina pribadi. 

Naha bet aya urang teh? 

Ayana diri urang teh 

ku ayana jasad atawa 

nyawa, atawa 

ku ayana jiwa, atawa 

ku hayangna zat atawa 

ku rasa, 

eta pertanyaan mulai minuhan alam pikiran manusa nu berpikir kana dirina, 

ngaragemkeun elmu jeung panemu dina dirina meunang tatanya 

meunang ngala ti dulur jeung   babaturan. 

Tah kitu geuningan 

asal muasalna urang ngamimiti diajar 

kana wawuh jeung dirina.

Bancet  rarecet, 

maksudna 

carita jeung lalakon mah rame jeung deui panjang euweuh tungtungna.

Bangkong  ngaheumheum  di  jero  liang, 

maksudna 

sakabeh  asal  muasalna carita 

nyaeta  ti jero diri manusa  keneh 

ngan  pastina  nu geus  warawuh  kana  dirina  

ku  ragemna  akal  

nu  pinuh  ku  pa ngarti  jembar  ku pangabisa 

mere maweh ku pituah atawa pituduh nu alus pikeun sakabeh manusa 

nu hayang wawuh soan kajero dirina 

supaya kapanggih jeung 

hiji kamulyaan diri.

Kapanggih jeung kamulyaan diri sajati. 

Bab ieu bakal dibuka kapayunna supados langkung eces dina nerangkeun perihal bab manusana.

hayam jago kongkorongok dina jero endog.

Tatarucingan atawa 

siloka pikeun 

mukakeun diri :

heula mana 

hayam jeung endog

heula mana 

sirr atawa heula rasa

heula mana 

wadah atawa heula isina

heula mana 

wujud atawa heula maujudna

heula keris atawa heula sarangkana

heula batu atawa heula taneuh

heula cai atawa heula angin

heula koral atawa heula heula pasir

heula langit atawa heula bumi

heula nyawa atawa heula jasad

heula caang atawa heula poek

heula siki atawa heula buah

heula akar atawa heula tangkal

heula ruh atawa heula jiwa

heula nagara atawa heula rakyat

Cing pikiran sing bener eta tata rucingan! 

Ngahaja di kahareupkeun supaya urang bener, 

bener daek mikir 

ulah ceuk batur, 

ulah ceuk beja. 

Sok urang babarengan pedarkeun  sakabeh  

nu jadi gerentes dina  hate  sanubari  urang,  

regepkeun tina manah jeung nurani nu jujur, 

apa bener urang teh 

geus pernah mikiran 

kana eta perkara nu ka cida enteng siga nu deet, 

siga nu heuheureuyan jeung sajabana.

Pileuleuyan pileuleuyan, sapu nyere pegat simpay, maksudna 

sabaraha lila urang teh 

geus mohokeun diri, 

poho kana ngelingan ka diri, mohokeun kana ngamumule ka diri, 

ibaratna geus teu wawuh 

ka diri, 

ngaraksa ngariksa ka diri jeung 

geus nepi urang 

kana ngalalakon kapanggih can jeung salsena? 

Geus beres acan urang teh ngabebenah, 

ngabebetah  diri?, 

cukup can pamanggih urang  teh pikeun ngabedah 

diri urang supaya diri urang kapanggih jeung 

eusina manusa?.

pileuleuyan pileuleuyan paturay patepang deui, mudah-mudahan sing aya dina waktuna 

urang bisa ngedalkeun sakabeh rasa 

nu geus jadi kapanasaran dina diri urang 

nu keur di bere hirup 

dibere nafas 

nu panjang 

pikeun maparkeun jalan anu yakin benerna.

hayam  hideung  

endogna  bodas, 

maksadna 

urang teh kudu hideung  pikeun nganyahokeunnana,  supaya  manggih  buah nu jelas. 

Nyacas eces ngebreh 

dina pikiran nu bersih hate, nu caang diregepkeun 

ku rasa jeung sanubari 

anu suci. 

Nyacas dina nurani 

anu narimakeun kana sagala  kakurangan jeung kaleuwihan manusa. 

Lain luhung ku elmu 

lain luhur ku aji. 

Eta manusa wawuh 

kana  dirina 

maka  bakal manggih kana  benerna diri. 

Jeung lain ku leber  wawanen atawa 

ku jembar pangabisa, manusa  bakal bisa wawuh kana diri teh, 

tapi 

ku rasa rumasa nu murni 

nu kaluar tina ati sanubari  nu  bersih, 

lain pinter nu bakal  ngajamin urang wawuh  kana diri. 

Sakabeh manusa boga haq pikeun wawuh kana  diri, mung ngan saeutik 

nu kapilih 

nyaeta 

nu daraek mikir, 

daraek tatanya. 

Tah ayeuna urang muka kana bab lanjutannana.

Sing kahade. 

Samemeh eunteup, 

kudu diintip heula 

sing taliti kadiri 

dina nalungtik kana jeroannana diri 

supaya manggih pangarti 

nu bakal jadi mustika jeung jimatna hirup.

eling eling mangka eling

rumingkang di bumi alam

darma wawayangan bae

raga taya pangawasa

lamun kasasarna lampah

nafsu nu matak kaduhung

badan nu katempuhan

Jisim nu ngarasa nyeri. 

Hate nu ngarasa cape. Hareudang nyandang wiwirang. 

Purba perbawa hawa. 

Ujub suma’ah takabur. 

Rea ku panggoda setan. Ulah syirik ka pangampih. Ulah  nyacad kanu lian. Dengeun pikeun eunteung bae. 

Nu  lian pikeun tauladan. Hade goreng kasawang 

ukur ku tangtung sakujur. Sing tapis ngawisik diri. Awak ngaraksa salira. Totonden hade jeung goreng. 

Mun peryoga sok turutan. Anu nista disingkahan. 

Anu rukun kanu umum, nyorang lampah ka  lumrahan.  

Anu  mangfaat  ka diri. 

Taya batan kahadean. 

Hade ucap, 

hade hate,  

hate sabar tawakal, 

pinuji  kinasihan, 

teu nunjuk ka luhur adigung, nyaeta jalma budiman. 

Hirup hurip.

Pamuka

Samemeh aya itu jeung ieu. Eta teu aya na naon 

iwal ti ayana hirup. 

Hirup awalna 

lain wujud 

lain jasad.  

Hirup mah hirup bae 

tanpa aya itu jeung ieu. 

Ayana hirup 

nyaeta 

ayana dina alam kalanggengan. 

Kulantaran makna  hirup teh  langgeng. 

Teu katungkul  ku pati, 

teu  kena ku ruksak. 

Teu keuna ku lapar,  

teu keuna  ku dahaga. 

Teu boga kabutuh  atawa  pangabutuh. 

Teu kacampuran ku itu jeung ku ieu. 

Hirup teh manggih caang dina nu poek. 

Manggih poek di nu caang, maksud poek  di dieu,  nyaeta  

nyumputkeun  

sagala  kanyaho 

sagala  kahayang. 

Atawa 

nyumput buni di nu caang, ngubur sagala kahayang, 

nu lain bijil tina kahayang. 

Hirup  eta  sorangan. 

Hirup teh sifatna mandiri sifatna oge 

bisa disebut rahasia atawa ngarahasiakeun dirina, mangka disebutna hirup teh rahasia diri 

nu teu bisa dicaritakeun atawa didongeng keun 

ku salian kanu hirup deui. 

Hirup boga makna wujud jeung boga makna mawujud. 

Hirup boga makna syareat oge boga makna hakekat.

Hirup sorangan disebut Haq, 

nu saukur di kanyahokeun ku dirina nu boga hirup, 

hirup euweuh rupana, 

hal ieu jadi pandangan hakekatna, 

hirup teu boga bau, 

hirup oge teu boga warna. Hirup ge teu boga bentuk tapi 

hirup pribadi boga rasa 

nu ngawalian diri, 

hirup teh bisa nyaksian dirina, 

hirup ge saukur ngadenge naon kahayang dirina, 

hirup teu bisa diatur ku itu jeung ku ieu, 

hirup boga kabebasan 

nu penuh pikeun ngatur dirina, 

hirup euweuh ucap euweuh basa, 

hirup teh ngan saukur  

rasa jeung caang. 

Saha nu wawuh jeung hirup maka bakal nyaho eta hirup.

Jeung bakal jadi bibit hirup eta sorangan, 

usik malik hirup saukur diwalian ku rasa  

jeung 

dicaangan ku dirina,  

ku cahaya sari dirina, 

nu sajati 

asal hirup ngawujud 

ku ayana opat perkara.

cai nu jadi ciri, 

silokana badan hirup, 

seuneu nu jadi ciri, 

silokana ruh atawa 

nyawana hirup, 

angin nu jadi ciri, 

silokana sifat hirup, 

taneuh nu jadi ciri, 

silokana rasa hirup.

Tapi sing kahade 

ulah salah  ngahartikeun 

hirup  lain cai, 

lain seuneu, 

lain angin, 

lain taneuh 

eta ngan  saukur  perangkat pikeun ngawujudkeun hirup. 

Hirup  ge bisa dihartikeun cicing, 

teu keuna ku owah 

makana siloka nu nyebutkeun yen 

hirup teh 

ibarat cai, 

teu bisa dibeulah, 

hirup ibarat angin, 

teu bisa dipapas, 

hirup ibarat seuneu, 

teu bisal dibeslah.

Hirup teh rasa, 

teu bisa dihalangan ku naon bae, 

kakuatan  rasa  hirup  

moal  bisa  diukur 

ku takeran,  leutik  tapi  gede, hurung moncorong dina tiap-tiap manusa 

nu hirup jeung dirina.

Sakali deui 

yen hirup teh 

dina poek tempat 

kaluarna caang. 

Jeung dina caang  nyumputkeun  diri  

dina samarna caang.

Ieu bab hirup nu kudu  dihartikeun,  

dilenyeupan 

supaya leuwih  kaharti 

yen hirup teh siga damar, hirup teh zat, 

teu bisa disaruakeun jeung ayana jasad, 

hirup teh 

haq kamulyaan pribadi 

dina kamandirian hirup. 

Hirup sarua jeung 

kasajatian nu rasa, sajatining hurip, 

dening  dzat, 

mangka  hirup 

ge sok disebut 

Robb 

anu nyekel tilu suluk hirup nyaeta : 

nur rasa, 

nur sari, 

nur  sajati 

pengaruhna kana, 

sirna rasa, 

sirna sari, 

sirna jati, 

hirup hiji kanikmatan pribadi  anu lain datang dina 

nu di dahar jeung 

nu di inum, 

kadaharan hirup 

ngan dua perkara 

ku aya na caang jeung 

ku ayana rasa.

Hirupna  Robb 

atawa 

dzat 

saukur bisa ditarima 

ku rasa dirina, 

rasa eta bakal ngawujudkeun cahaya atawa caang kana jero dirina eta rasa pribadi. 

Katingali ti luarna bakal siga cahaya atawa  sinar anu ngabersit kaluarna tina dzat eta pribadi, 

siga  bentang  nu  ngan  saukur  boga  cahaya  

nu  kaluar  tina  dirina  

lain  caang ku lantaran ayana cahaya anu nyorot kana eta bentang, 

gugusan dzat atawa bentang nu pang gedena  saperti ayana panon poe. 

Ngan  kahade  

eta hirupna dzat atawa Robb eta leuwih sampurna 

tibatan ayana  bentang  jeung  panon  poe, 

eta saukur jadi perlambang atawa gambaran silokana, sing waspaos tina ngartikeun jeung ngahartikeun ieu bab 

supaya ulah kajebak 

ku rupa-rupa perlambang anu  ditampilkeun 

ku lantaran sakabeh anu aya ngajadi lautan simbul 

pikeun muka kana 

hirup nu sajatina. 

Ulah samar jeung  kasamaran. 

Hirup teh 

ngeusi  kana  sakabeh ruang,tempat, jeung waktu. 

Sabab hirup teh 

hiji anu teu disababkeun 

ku itu jeung ku  ieu. 

Hirup oge 

bisa boga kahendak atawa kahayang.

Hirup aya  

tapi euweuh wujudna. 

Tapi hirup eta sorangan 

bisa ngawujudkeun dirina 

ku sabab haqna 

eta sorangan.  

Eta disebatna 

kawenangan eta wujud.  

Ngan  

dina sagala perwujudannana hirup 

bakal nyamarkeun dirina 

ku lantaran hirup dzat  mah tersembunyi atawa ngarahasiakeun dirina, 

ngan 

maujudna mah pasti ayana tiasa ditingali 

sedengkeun 

wujud aslina mah 

tetep disamarkeun saukurtiasa 

ditingali 

disaksian 

ku dirina sorangan.

Maka jelas mun disebut 

dzat mah 

embung disaruakeun, 

jeung sakabeh 

nu ngawujud 

jeung keuna nu ruksak. 

Hirup 

bisa nampilkeun rupa-rupa warna dirina. 

Hirup 

bisa  nampilkeun mangrupa bentuk wujud, 

hirup 

bisa mintonkeun mangrupa rasa dina dirina, 

hirup 

bisa ngawujudkeun rupa-rupa babauan jeung wawangian serta rupa-rupa alam dirina. 

Hirup eta sorangan boga mangrupa rencana pikeun dirina 

kulantaran hirup ge 

kadang katingali ku dirina jeung nyaksian dirina serta  ngawalian dirina. 

Maka hirup 

kadang aya 

kadang euweuh 

kadang ngawujud 

kadang  maujud 

kadang bisa jadi syareat kadang saukur jadi hakekatna, 

maka  

hirup  teh  

teu kena ka wates 

ku rupa-rupa hal 

anu bakal ngabeuratkeun dirina. 

Hirup saukur wawuh 

jeung dirina atawa 

anu wawuh jeung dirina. 

Nyaeta 

cahaya jeung rasa. 

Hirupna dzat  

boga  sifat  hirup. 

Hirupna Robb 

boga ngaran, 

Hirup ge 

boga sir, 

boga af’al. 

Hirup teh 

boga bebener kana dirina serta jujur kana dirina,  

hirup teh 

boga tekad jeung 

laku  lampah, 

hirup teh 

haq ngawawuhan dirina.

Ngan rumasa kana dirina jeung ngawalian rasa dirina, maka 

hirup teh bakal ngahiji jeung jatining hirup dirina, nunggalna tunggaling dirina, nyaksian sagala bener  dirina, 

nyaksian sagala  laku lampahna,  tekad  dirina,  rencana  dirina, 

nyaksian kana harkat darajat dirina, dina tangtungan dirina, anu tunggaling diri.

Maka bener mun disebut yen hirup teh 

ayana dina 

asma, sifat, dzat, sirr, af’al anu ngajadi  maujudna, 

laisa kamislihi syaiun 

walam yakun lahu kufuan ahad 

kun faya kun,  

teu  aya  deui  hirup  

salain hirupna  pribadi,  

teu  aya  deui  anu  disaksian  salain  ti  nyaksian 

rasa tunggalna pribadi, mandiri  tina  sakabeh  tekadna,  

ucap  dirina,  

laku  lampah  dirina,  

jujur jeung bener pikeun dirina, 

ngaraksa ngariksa dirina, dina kalanggengan dirina 

nu sajati,  

sampurna  ku  sajatining  haq  na  

maka  hirup  

mun  geus  kapanggih  jeung hirup bakal manggih 

ka na saestuna diri.

Bab lain aya oge anu muka kana harti 

yen hirup teh 

nu sabenerna mah 

teu ngaboga -boga, 

hirup teu boga ngaran 

da hirup mah 

tetep hirup 

teu butuh ku ngaran, 

ngan  hirup ge 

butuh ku salamet 

pikeunn nyampurnakeun sakabeh rasa dirina ngawaluyakeun dirina, 

hirup oge ngawicaksanakeun 

kana dirina 

asih kana dirina, 

ngasuh kana wujud jeung  maujudna, 

ngasah sakabeh rasa dirina,  bisa ngamumule jeung ngabagjakeun kana dirina, 

hirup ge wawuh kana awalan jeung akhiran dirina, 

hirup ge wawuh jeung qodho jeung qodar dirina.

Dzat  hirup  ge 

boga  jinis,  

boga  jisim,  

jirim  dirina,  

jinisna  robb,  

jisimna  cahaya 

jirimna rasa. 

Sanajan yen dirina teh 

lebur dina sakabehna.  

Jadi hirup teh  

tetep hirupna. 

Lebur dina sakabeh nu aya. Jeung lebur dina sakabeh nu teu ayana. 

Tapi hirup tea tadi 

tetep aya dina hirupna. 

Sajatina pribadi hirup 

dina poek tetep aya nu hirup. Dina caang  oge tetep aya nu hirup 

teu aya nu ngawatesan dirina salian ti karep dirina. 

Da sakabehna 

aya dina pikirannana hirup eta pribadi,  

aya dina tanggung jawabna pribadi jeung sakabeh ijinna  pribadi. 

Lebur dirina   

musnah dirina, 

dina alam hirup jeung kalanggeungannana pribadi.

Maka hirup teh 

disebut sang pribadi haq tina sakabeh sajatining haq, da  hirup teh 

bisa ngukur kana tungtung rasa dirina pribadi 

teu sieun ku itu jeung ku ieu da ka beh geus ka cekel 

jadi rahasia dirina pribadi sakabehna oge geus 

ka eunteung ku dirina.

Maka jusnurna  hirup  teh sampurna teu kena ku robah, 

maka 

hirup yakin kana wajibul wujudna diri  atawa  jasad, 

aenul yakin  kana wajibul  goibna. 

Manusa, 

nyawa, 

ruh 

haqul yakin 

kana ghoibun ghoibna. 

Sajatina rasa atawa 

batin 

pikeun nyaksian  

jeung ngawalian cahaya  rasana. 

Cahaya rasa ieu 

aya dina tempat anu poek buta rajin, 

aya dina alam keueueng 

nu ngadangdeung, 

di dingding ku rupa-rupa kelir, 

nyacas di alam mokaha, nitis dina sari, 

nirca dina rasa, 

mancala pancasona sajati, nunggalna nafs dina nafas nu sajati, 

hirup langgeng salalawasna di  alam  rahasiana,  

hirup sang  mukamil,  

lebur sakabeh kubur, 

lebur papan lan tulisna, bersih suci teu aya corat coret deui, 

musnah ilang tanpa karana, ka alam kanikmatan 

anu tanpa kira kira, 

ilang rasa, 

ilang cahaya, 

hirup dina kalanggengan jeung kanikmatan nu sajati.

hong munah

sing kari munah

munah lemah munah langit

bayu punah bayu kapunah

rahayu swasti astu

nirmala seda malilang

jisim lantif kang salamet

kubur kang allah

manusa ngandeg

alam padang poe panjang

nagara tunjung sampurna

sah jero sampurna jasad

sirr dzat les

kusuma jatining sampurna

suci dunya akherat

sirnaning jinagad gusti

menyang tujuh lapis bumi

tujuh lapis langit

les angles

panglimunan gusti

nurbuat dzatining hirup

hirup manusa sunda

Perbawa teu puguh dumuk

Tara tanjruh kunu bukti

Balukarna hejo tihang

Mun pasilingsingan ati

Nyiar keneh susuganan

Nu enya di lain lain

Hiji ciri manusa 

nu wawuh kadiri

Bagja hurip bareng gusti

Sajeroning hirup 

iwal ti pasrah

Neda parentah gusti 

jeung rosulna

Hirup hurip manusa pasti

Lain hirup owah gingsir

Tapi teguh mawa bakti

Lampahna jadi tauladan

Budi panrangina 

siga nu elehan

Tapi hate 

cadu eleh

Kanu salah

Kalawan patokan urang

Cicing dinu bener

Nangtung dina sahadat

Manusa nu pasti

Teu nyiar pribadi

Kaluar ti diri

Manggih pasti

Wates haq na diri

Gusti ngancik dina alam manusa nu tunggal

Ngajadi saksi dirina

Saksi Gusti nu hakiki

Rido tur ikhlas

Sumerah kana 

nafsiahna Gusti

Renghapna nafas 

eta manusa

Dihampura sadaya daya

Kusorotna nur cahaya rasa

Gustina nu sajati

Hurip tunggal

PANGEUSI

Bagja manusa nu fakir dirina sabab bakal manggih kana rasana hirup.

Bagja manusa nu manggih sedih sabab bakal manggih kana nunggalna hirup.

Bagja manusa nu manggih kana halusna hirup sabab bakal manggih kana rasa sajatina hirup.

Bagja manusa nu lapar jeung haus kana bener sabab bakal manggih kana kapuasan rasa hirup.

Bagja manusa anu murah hate sabab bakal manggih kana sagala kamurahan hirup. Bagja manusa anu manggih kana kasucian dirina sabab bakal ningali atawa  nyaksian robbna nyaeta zat hirup nu sajati.

Bagja manusa anu ngadegkeun kadamaian jeung karahayuan sabab nyurup rasa hirup nu sajati.

Bagja manusa anu di aniaya ku sasamana sabab bakal hudang rasa nu sajati tina jero dirina, anu nantungkeun hak jeung bebener dina sakabeh rasa manusa nu pasti. Bagja manusa anu dicela ku sabab manggih hirup nu sajati sabab rasa moal bisa  dibobodo, moal bisa dibohongan, moal bisa diulinkeun mangka cahaya hirup bakal  nyorot ka dirina.

Caang  padang  narawangan,  poe  panjang  nagara tunjung sampurna  “dina sagala nu hirup eta, aya kami nu boga hirup, jeung kami keneh nu jadi rahasia hirupna”. “sakabeh rasa aya dina nu hirup jeung nungkulan kahayang  rasa  hirup  nu sajati.  Ngan manusa loba  ngarobah sagala kahayang KAMI, jadi kahayang dirina. Maka loba manusa anu ingkar dina jalan hirup KAMI. Maka  KAMI nyumputkeun diri KAMI dina poek dirina”.

“KAMI hirup. moal ngabohongan  kunu  can  warawuh  ka  KAMI. KAMI nyaksian hirupna manusa, sabab KAMI aya dina hirupna manusa, jeung rasa manusa. sabab kami hakekatna manusa”.

“Manusa teu boga haq pikeun dirina salian ti KAMI. Maka manusa wajib nyaksian kami supaya ulah ngalajur nafsu dina dirina”. “kami boga haq pikeun hirup kami kami anu boga haq ngatur diri kami. Sabab kami nu hirup jeung benerna KAMI”.

“Manusa nu teu nyaah kana hirupna, sarua jeung teu nyaah ka KAMI”

 

“Manusa anu teu mikir kana dirina, maka bakal jauh jeung KAMI”, “KAMI hirup, anu  diuk dina rasa manusa anu lantif dina dirina. KAMI hirup anu milih jeung kapilih tina sakabeh nu hirup”.

“KAMI hirup teu gedag ku ka anginan, teu tiris ku kahujanan, teu panas  kukapanasan, teu leungit ku diduruk, teu sirna ku singsieunan, teu hanjat ku  dicacag”. 

“KAMI hirup teu ngaboga-boga,  teu katundung  ku sedih,  karagragan  kusangsara, teu katajong ku cilaka, teu nincak awi regas, teu kahalangan  kupipinding”. 

“KAMI hirup teu butuh pamuja teu butuh pamuji, teu syirik ka pangampih, teu nyacad kanu lian”.  

“KAMI hirup anu teu boga  pamrih. teu  neang upah”. “Hirup  lain  nantung,  lain  diuk,  lain  sare,  tapi  hirup  teh  cicing   bari nantung”. “Gek bari diuk, rogojod bari sare bari indit, gap bari nyabak. set bari meta, bray bari beunta. nging bari ceurik, nyeh bari seuri”.  “Saha manusa anu wawuh  jeung  dirina,  maka  wawuh  jeung  hirupna  KAMI, jeung  benerna  KAMI. Maka  bakal  dijamin  hirupna ku hirup  KAMI,  diganti hirupna ku hirup  KAMI. Moronyoy rasana ku rasa KAMI. Caang dirina ku caangna diri KAMI, dina  jero jeung luar dirina”. 

“KAMI hirup anu nyaksian jeung disaksian ku aranjeun sabab KAMI teu butuh ku dunya aranjeun sakabeh geus kami pasrahkeun ka aranjeun”. “Sing saha jalma anu ngalaworakeun kana nyaksian ka KAMI, maka KAMI ge bakal nyabodokeun kana sagala nu dilakukeun ku dirina sabab KAMI moal ngahukuman ka maranehna salian kalakuan maranehna sorangan anu bakal ngahukuman kana dirina”.

 “KAMI  karunya  ka dirina  tapi  dirina  teu nyaah  jeung  karunya  ka dirina sorangan, sing saha jalma anu teu nyaksian ka KAMI maka aya dina hiji karugian nu gede”.

“Ya Muhammad apa anjeun jeung umat anjeun teh geus nyaho kana surga kami?”

“naha umat anjeun ngaharep kana surga KAMI  naha  bakal aya  surga  nu  bakal kami bangun di mana aranjeun geus ngalaman alam maut”. “Teu aya surga jeung naraka nu KAMI buat pikeun aranjeun. Salian aranjeun sorangan nu miharep kana eta  ayana  surga,  jeung  moal  kami  bangun  eta  surga  jeung  naraka   salian  keur aranjeun ngalaman keneh hirup gelar di alam dunya”.  Sabab  kami  teu ngarepkeun aranjeun manggihkana surga nu dibuat dina alam misal aranjeun tapi kami saukur miharep aranjeun nyaksian kana benerna jeung ayana kami.

“Mun manusa eta masih miharep kana surga kami sabenerna dirina can wawuh jeung kami. sabab kami saukur miharep ka aranjeun pikeun jadi saksi-saksi kami”. “Saha anu miharep upah ka kami, sabenerna manehna meunang upah tina naon anu diyakinkeun kudirina lain ti kami”, “Jeung saha jalma anu  miharep kana bebendon  ti  KAMI sabenerna eta datangna bebendon teh ti dirina, lain  ti KAMI”. “KAMI Dzat anu Maha Sampurna anu teu kitu teu kieu. Ngan KAMI aya dina sakabeh syak jeung wasangka aranjeun”.

“KAMI hirup, anu aya dina sakabeh hirup aranjeun. Ngan aranjeun teu wawuh jeung  kami.  Jeung  teu  nyaksian  ka  kami. Saukur lisan anjeun nyaksian KAMI ”.

“Hirup eta hiji kaadaan, hiji kanyataan, teu bisa dipungkirkeun deui” “Hirup hiji eusi pasti  butuh wadah, ngan moal cukup ku hiji. Tapi tiap wadah nu aya can tangtu cocok salilana. Hese neangan wadah nu pas jeung eusi”. “Eusi ge kadang nyaah  ka  dirina, maka pikeun ngeusina eta wadah, kadang nunggu hiji wadah anu pas  dipersiapkeun dina waktu nu lila, pikeun nyaimbangkeun pamor eusi jeung urat wadah”.

“Hirup eusi hirup wa dah ngahiji dina rasa. Rasa nya angan luar jeung jerona eusi. eusi  nampilkeun wadah. Wadah nampilkeun rasa, perbawa eusi” “Ibarat amis jeung giungna, pait jeung nyaketna, asin jeung ngelelna” “Ibarat  badag  jeung lemesna, leuleus jeung liat na, sari jeung rasana, cahya jeung caang na, moronyoy jeung sorotna”. “Maka lamun wadah jeung eusi geus ngahiji, jadi saru, kulantaran jadi sarupa. Sareunteut saigeul sapa temon sahiji atawa nunggal ”

“Eusi aya anu leuwih lemes ti wadah, atawa wadah leuwih hipu ti eusi. Aya oge eusi jeung wadah sarua lemesna atawa sarua heurasna” “Kadang aya wadah teu sarua  jeung gambaran eusi. Kurangna  wadah ditutupan ku eusi. Kurangna eusi ditutupan ku wadahna”. “Ngan emang pikeun ngudag anu pas atawa  punjul eta aya dina perhitungan jeung rencana hirup nu leuwih sampurna. Ngan biasana  bisa kaitung atawa saeutik nu kapilih, pas antara wadah eusi  jeung ngaran saimbang atawa  silih mawakeun. Saperti Koneng: ngaran, wadah, eusi sarua atawa ngahiji”.

“Kalanggengan hirup eusi teu katingali ku rupa, ku seungit, atawa bau. eusi pasti kasirep kaluarna atawa  wadahna.  Aya nu wadahna  leutik  tapi  eusina  bisa  jadi panyear alam ”

Hirup Ngan saukur ngaran. saukur kasebutna. Ari hirup teh nu kumaha rupana? Jelas hirup teh teu aya bentukna. kumaha ari warnana hirup, sugan aya jirimna? apa mereun hirup teh aya bau jeung seungitna? can aya anu eces nerangkeun kana hirup teh. Naha can nyarahokeun kana hirupna? ari sapopoe teh jeung saha atuh maranehna bisa usik jeung malik. Naha lain ku hirup meureun maranehna bisa ojah kokojayan dina alam ieu. Ari hirup teh cicingna dina naon? apa ari hirup teh boga tempat? apa hirup teh ngeusi kana sakabeh ruang? jeung aya dina sakabeh waktu? saha saksina hirup teh? jeung naon ari ngaran aslina hirup teh? cing saha anu geus wawuh jeung hirup? jeung saha a ri ngaran na anu bisa nyaksian hirup teh?

Sigana moal waka aya jalma anu beuki kana ieu carita. Komo bari daek mikiran kana naon anu jadi pertanyaan jeung tatarucingan eta hirup. Mimiti tah urang teh narawangan kana jero alam pikir urang pribadi. Anu sapopoe makean hirup bari jeung teu wawuh kana hirup sora ngan. Cing urang sieurkeun lalakon teh. Supaya bener-bener medarna. Kaharti katarima kunu daraek mikir, daraek ngajina, daraek maca hirupna supaya  manggih hirup nu sabenerna anu saja tina jeung nyaho kana haqna eta hirup pribadi, sing katimu sing ka harti, katimu ku akalna kaharti ku jeroning atina, acining elmu aya dina jero diri.

Breh buka bray caang sing lalaunan ulah hayang buru buru muka, bari jeung gura-giru tina muka bab ieu. Samemeh eunteup kudu diintip heula. Samemeh ditelen kudu dibeuwung heula. Samemeh dihuapkeun kudu dipilihan heula. Ulah samar ku beja, samar ku tetenjoan, samar ku ambek, kabawa sakaba-kaba, katelah bisa jeung  nyaho bisa maparkeun tapi bari can puguh nyaksianana. Kahade urang kudu  ati-ati  sing imeut ulah gampang kaolo, kapangaruhan kabawakeun kacampuran ku nu  teu  pararuguh, reugeupkeun dina hate, wadahan dina ati sanubari, siratkeun eta  nurani  nu bersih, bijil rasa sajati, kanyaah kadiri, ciri welas asihna, hirup kana wadah nu dicicingan nur sajati.

“sir wenda, dat nur wendah”

Hirup bareng jeung huripna, hirup teu kena ku sabab, tapi hurip ku sabab keun ku ayana hirup. Kumelipna bentang kulantaran aya nu hirupna atawa aya nu jadi hirup dina dirina. Hirupna ngahiji jeung caangna  diri, lain caang nu datang ti luar dirina “Ari Robb, can aya kalimah nu pas pikeun nerangkeun naon eta Robb. Tiasa  disebat dzat, kusabab Agung tur Sampurna. Endah kabina-bina teu tiasa dirupakeun atawa digambarkeun ku samanea, saukur nu geus nyaksian eta Robb tapi pa sti bingung mun dititah ngarupakeun eta rupana Robb”.

“Maka disimpulkeun ku ayana eta Robb sakabehna tehbisa hirup”. “tempat kaluarna eta Robb dina poek mongkleng buta rajin”. “Buburiakan ku hurungna, ngagebur cahayana nyorot caangna,  endah  rupana, endah  warnana  teu  bisa dikira-kira”. “Eta Robb oge nyumput buni dina caang, nyumputkeun sajatina dirina, ngarahasiakeun sahadirina  nu jadi misteri rahasia sakabeh alam hirup”.

Alam hirup sakabeh manusa, sakabeh alam, sasatoan, tatangkalan  jerona  langit, jerona  bumi,  jeung  jerona  lautan. Alam hirup Robb teu kahalangan  ku tempat waktu  rohangan,  jeung masa,  eta sakabehna  nu  ngajadi  alam  hirup. Alam  nu endah, alam ribuan cahaya, mangjuta rupa, mangjuta rahasia.

Pikeun manusa anu daek ngulik naluktik  kana  sakabeh  wacana alam Robb, kurangna urang bisa mesek kana ieu bab moal tangtu beak ku sataun atawa dua taun, ka saumur tangtungan urang kumalayang di alam dunya ieu moal waka kahontal, kaburu kapegat ku nyawa.

Maka peupeujeuh ti kami, teangan hiji  kolot atawa guru anu luhung ku elmu jeung pang artina anu bisa mukakeun ieu sakabeh rahasia alam ngan anu leuwih jentrena, teangan guru anu geus pertapa, nyaho jeung dikanyahokeun naon anu kudu ditapaanana jeung geus kapanggih jeung tatapaana, ngan sing kahade, eta ge kudu diuji heula, bisi manggih careuh buluna domba, mere elmu kudu aya jasa.

Keun ka ukur iyeuh ku rasa diri, lamun rasa merean, hartina aya saeutik benerna ngan lamun rasa teu panuju tong diteruskeun, pan moal aya lamun urang menta wajit diasongan gambang. Sing  tarapti, ulah kabawa sakaba-kaba kajurung  ku napsu, bisi hanjakal  jeung  kaduhung, mun nu bener mah eta  guru, moal  loba pamenta jeung sarat naon-naon, ku kapanggihna oge geus bungahna.

Sok teangan pigurueunana. Wawuh ka gusti, kudu di dunya, di akherat saukur siksana, Gusti moal rek ngadzoliman ka umatna, iwal ti umatna nu ngadzoliman dirina. Puguh kudu diwawuhan, memang wajib disaksian, mun  saukur ku lisan budak anyar borocot ka dunya ge bisaeun, mun bener urang boga tekad Gusti bakal muka jalanna, ulah gampang dibobodo, ulah gampang  dipinteran, mun bener kyai teh sakti, geus puguh can nyaksian? mun  bener eta ulama  teh bisa, kudu nyaho bari maksa eta elmu kudu bukti, ulah saukur neangan panglaris.

Salamet lain jang saukur di dunya tapi kudu nepi ka akherat. Ngudag dunya moal aya tungtung, akherat geus tepi dina tikoro,  sing  kahade, loba anu alim, alim pulasan, luar jeung jero teu sa rua. Ngaku ulama loba maksiat, kitu deui haji-haji.

Kudu nyaho kana  hakekatna ulama, komo deui  hakekatna  HAJI.  Mun  bener papanggih jeung nu kitu, tanyakeun heula ku anjeun, naon anu  leuwih  luhur batan langit, naon anu leuwih beurat batan bumi,  naon anu leuwih cepet batan angin, naon anu leuwih loba batan jukut.

Mun can nyaho jawabna, eta kitab geus di gelar  di sakabeh alam. Jadi panyear jagad, lain saukur  dibaca  dibolak-balik.  Panon bolotot mata peda,  hirup teh wasiat diri, hiji amanat pikeun wawuh jeung dirina. Ayeuna tah naon anu leuwih jero batan leuwi, batan laut, batan bumi? naon eta tunggul karang tumaritis? mun urang  bener geus nyaho jeung hirup moal aya deui eta rahasia, lamun gajah nyaho iraha   eta manehna kudu balik mulangkeun hirup kanu hirupna  maka sakabeh sasatoan  bakal ti hareula balik ka Rohmat  suci, naha  bet manusa  nu dimuliakeun, boro boro nyaho, komo kudu dikanyahokeun ku dirina mah, jeung nu bogana hirup can tangtu geus nyaksian komo wawuh kana kubur nu hirup, eta ciri pinterna manusa, bodona jalma.

Tiwu hideung, catang kangkung, ari ti luarna mah  hareuras jerona mah kosong, awi andong, wesi bolong kuat katingalina mah, da  geus  di yakinkeun benerna ngan kamana neangan eusina.

Aya guru, mun ditanya, nagara alaihim susulumpatanna dimana? deuh ceunah eta mah tatarucingan budak, tapi ngajawabna teu beluleun.

Lamun aya nu kajepit jadi ucing, nu nyumput kudu dihongkeun, sakabeh siloka  jeung tatarucingan ulah dianggep enteng mun teu kapanggih, kaduhung sagede gunung, hanjakal kabina bina.

Indung keur lenjang, Bapa keur bujang dimana urang ayana?

mun langit tacan aya, dunya tacan dibuat dimana urang cicingna?

Bral kaditu tareangan, naon maknana naon eusina kaharti jadi pangarti, katimu jadi panemu, jadi jampi pikeun diri, elmu lain kaluar dina bincurang jeung siku hirup manusa, disamakan ku raga, dianggelan ku nyawa, dielingan ku guguling, diharudung ku salimut, dimana ngancikna hirup teh?

Moal rek neangan domba nu loba, ngangona oge sakitu beuratna, ngan saukur neangkeun domba  anu  leungit  tina  sakitu  lobana  domba. Sugan ku manggih hijina. Oge leuwih bungah tibatan ngangon anu ngaratus jeung ngarebu. Lain rek ngajual, lain rek meuli saukur nganteurkeun kanu bogana da lain haq kaula. Eta domba teh aya nu bogana aya nu leuwih haq,  kaula  saukur  tatamba  sugan  ka anteur, bisi eta domba teh keueungeun rek balik  ka  kandang,  bisi  poekeun  di jalan, sugan kaoboran. Bisi lapareun teu manggih dahar, bisi susaheun teu manggih jalan balik, da ngarana oge domba, kiwari sok disebut embe sok saukur tuturut munding, kumaha wae nu hareupeun kabawa ku itu, kitu. Kabawa ku ieu, kieu.  Sugan  ari  geus  dianter  mah,  bisa  balik  sorangan  ka  kandangna  da  geus nyaho jalan iyeuh. Iraha waktuna nyiar dunya, iraha  waktuna  kudu bebenah, iraha waktuna  kudu beberesih. Jadi teu kapoosan dina waktu nu munggaran,  nyaho iraha waktuna kudu mulang kandang. Supaya tartib, rapih, beres sagala urusan, ku ningalina ge geus bungah, ku ngadengena ge geus senang. Moal rek sirik, komo ngalelewa mah justru rek nurutan supaya sakabeh embe jeung domba teh nyarahoeun balik ka kandangna sorangan. Sugan kawaris sakabeh.

PANUTUP/PANGJEUJEUH

Sakitu heula  eta pedaran  jeung lalakon, moal waka rek jentre ngabuka kana  ieu lalakon nu jadi konci. Sakabeh manusa nu gelar di alam dunya ngan saukur rek mancing dina cai nu herang sugan laukna beunang, lamun bener beunangna, rek dipais tapi samemehna rek dipais dibumbuan  heula, jeung  diuyahan heula supaya  ngeunah rasana, mun embung saukur beja, saukur cenah wayahna kududaek neangananna dimana eta ngancikna jimat hirup jeung naon eta mustikana hirup. Jauh dijug-jug, anggang diteang ari nu dekeut diliwatan, ber ka ditu, ber ka dieu. Jarah, ka kaler, ka wetan, ka kulon, jeung ka kidul meunang naon?, awak leuleus, sirah lieur, beak itu, beak ieu. Hayang menang tapi bebeakan, karunya teuing.

Tong siga batur, tong siga nu lian, tong kabawa angin, kajuru ku seuneu, tong nuturkeun teuing indung suku, tong samar kunu ka tenjo bisi kasebut hejo keneh tihang. Teang jalan jeung lampah nu pasti.

Panutup, neda bagja ti sadaya, neda caang ti papada, neda hirup hurip sadami, sapadamian ngajadi, rukun kanu  umum, runtut  raut  jeung balarea,  leukeun neangan  panuntun, peso raut  bakal seukeut. Alus ku  niat, bisi  goreng  ku  tekad, alus ku ucap, bisi goreng ku basa, manusa kudu silih hampura pikeun ngawangun nagara dina hakekat, waruga dirina supaya sampurna  jeung  sejahtera hirupna jeung dipika asihku sasama kupapada jalma, damar ngajadi darma, darma ngahiji jeung damar, manusa teu daya upaya, anging masrahkeun sadaya daya ka jinisna, nu  kagungan jisim jasmani  panganika  nu  kagungan  pangawasa.  Isuk  jaganing pageto, sing kapanggih jeung  eusina, sing gede hate, ulah pondok pangharepan. Titis  tulis moal pahili. Neang bagja, teu manggih pahala. Pahili moal kapanggih. Pahala moal katarima.

Saukur bagja nu kabina bina, swarga tanpa kira-kira.

Muji abdi, muji gusti.

Abdi nu muji gusti.

Gusti muji ka abdina.

Muja muji tunggaling pribadi

...cag. tabe pun

kengeng nyutat ti rerencangan, mugia aya mangpaatna ==========================================